مسلسل فاتن أمل حربي | واقع يحدث في مصر

مسلسل فاتن أمل حربي | واقع يحدث في مصر

عندي حالة توحد و حزن رهيبة مع مسلسل فاتن أمل حربي .. لدرجة إني أكاد أجزم إن أستاذ ابراهيم عيسى كتب قصتها من وحي قصتي ..!!

بل إن الحقيقة أبشع مليون مرة .. و الأزواج الحقيقيين أندل مليون ألف مرة .. و المحاكم و القضاة و منفذي الأحكام متعنتين و ظالمين أكتر من كده مليار مرة .. و المحاميين مستغلين أكتر من كده مليار ألف مرة ..!!

كل اللي بتشوفوه ده مجرد أحداث درامية .. يادوب بتسلط الضوء .. لكن عمرها ما هتنقل عُشر المعاناة الحقيقية اللي بتشوفها الأمهات المطلقات المعيلات في البلد الظالمة دي ..!!

الست اللي بتتطلق أو تاخد خلع و معاها أطفال في مصر بتتهان .. قولاً واحداً بتتهااااااان .. مافيش حد إلا و بيحاول يبتزها و يستغلها و يطمع فيها .. !!

مافيش شغلانة بتعرف تشتغلها و تعيش منها و تكفي نفسها إلا لو قبلت تدفع رشوة جنسية لصاحب العمل .. مافيش حد بيحتضنها و لا بيطبطب عليها حتى عيلتها و أهلها ..

مافيش حد بيستقبلها في بيته زي المسلسل .. و لا بيكون لها أصحاب داعمين زي المسلسل .. و لا كل اللي بيعجبوا بيها بيكونوا رجالة محترمين و بيطلبوا منها الجواز الرسمي زي المسلسل .. الحقيقة أبشع من المسلسل بكتييييييير ..!!

كل ست دخلت محكمة الأسرة لها تار بايت مع كل واضعي قوانين الأحوال الشخصية و منفذيها .. تار بيوصل لمرحلة إنتا بندعي عليكم ليل نهار تشوفوه في أعز الناس على قلوبكم ..

اوعوا تصدقوا اكذوبة ان قوانين الأحوال الشخصية في مصر منصفة للمرأة .. دي ديباجات بس عالورق عشان بتوع حقوق الانسان و المنظمات النسوية العالمية يتخدعوا فينا ..

مربوحة زوجة الكبير | سبع ولا ضبع؟ .. تايجر !!

الحقيقة إن كل ما في محاكم الأسرة المصرية ظالم و مهين و متعسف تجاه المرأة ..

كل الأحكام تعاقب النساء و تصدر في صالح الزوج الندل و تكافئه على تهربه من مسؤولياته بتقسيط حقوق أولاده و زوجته و اجتزائها و انتقاصها و الخصم منها بعد إجبارها هي على دفعها مقدماً و تقديم ما يثبت من وصولات و فواتير و خلافه .. ده إن تم الحكم بيها من الأساس ..

و الحكم طبعاً بيكون بعد فترة مش أقل من سنة .. و مش مهم تجوعوا تموتوا تتشردوا تباتوا عالرصيف .. المهم الباشا ما يتزنقش في الفلوس و يعرف يعيش حياته ..

قريباً جداً هعمل حلقة live بعنوان مسلسل ” دينا السيد أنور ” .. بطولة ضحية حقيقية لمحاكم الأسرة المصرية الظالمة .. لكن المرة دي مش هتكون دراما .. هتكون أحداث حقيقية أبشع و أسوء ألف مرة من المسلسل الفرفور ده ..

نصيحة من كل قلبي .. اوعي تتجوزي في البلد دي .. و لا تتجوزي من رجالة البلد دي .. سيبوهم يتعفنوا و يموتوا محتقنين .. لأن غالبيتهم العظمى بنفس سوقية و همجية و نطاعة و سفالة بطل المسلسل “سيف” .. بس سيف مؤدب حبتين .

#الدكتورة_بنت_الباشمهندس

صفحتنا الرسمية فرندة – Farandh

 

للمزيد..

ظهور الشيخ التوني في مسلسل المشوار | اسمع الكلام الحلو !!

 

شارك المقالة