ملك الكاشف تحكي تفاصيل تعرضها للتحرش| المحامي كان بيلعب في جسمي وأنا نايمة!!
دونت ملك الكاشف “أول شاب متحول جنسيا مصري” تفاصيل عن تعرضها للمضايقات البدنية والتحرش الجنسي من محاميها الخاص ع.م منذ مدة أثناء نومها في منزله.
وذكرت ملك الكاشف أن هناك لجنة من المفوضية المصرية للحقوق و الحرياتتولت التحقيق في موضوع تعرضها للتحرش وأدانت اللجنة في تقريرها المحامي واتهمته باقامة علاقة غير رضائية معها.
مساء الخير
انا بقالي سنة بفكر اكتب البوست ده و في كل مره كان بيكون في أسباب مختلفه تمنعني اكتبه.. في تحقيق شغال، الناس هتقول عني ايه، الإعلام هيهاجمني، هتعرض لهجوم ضخم وانا ماصدقت قطعت شوط طويل في علاجي النفسي..الخ الخ الخ
لكن النهاردة قررت أن كل ده مش مهم قصاد اللي عانيته و اللي مريت بيه في التجربة دي و ما بعدها واللي مش هخف منه غير اما احكي ولذلك قررت اطلع و اقول للعلن إني اتعرضت للتحرش الجنسي و العنف النفسي من شريكي السابق الأستاذ المحامي عمرو محمد و اللي في نفس الوقت كان المحامي بتاعي.
ازاي إتحرش بيكي وانتو كنتو مرتبطين؟
اللي بيفرق التحرش عن العلاقة الرضائية هو موافقة الطرفين، و اللي حصل عكس ده انا مكنتش موافقه و قولت ده بشكل واضح من أول العلاقة لعمرو واني معنديش اي إستعداد ان حد يقرب مني لأني كنت عاملة عملية سايبه في جسمي ٢٠٠ غرزه و لأني كنت لسه بتعرف على جسمي و بفهمه ولأني مكنتش عايزة!
و برغم ده عمرو قرر يمد ايده جوه جسمي وانا نايمة ولما صحيت مخضوضه كان بيقنعني ان دي تهيؤات بسبب الأدوية النفسية و اتصل بواحدة من أقرب صديقاتي و قالها ” ملك عندها بانيك أتاك ” عشان يسبق و نصدقه و كرر نفس الموقف تاني بنفس الطريقة لحد مادخلت مصحة نفسية في شهر ١ عشان كنت شاكه في ذاكرتي و عقلي و لأخر يوم في العلاقة دي عمرو كان بيلعب طول الوقت على عقلي و مرضي النفسي لحد ما دكتورتي ساعدتني اني اواجهة و لما واجهته اعتذر لدرجة انه قال انه هيستقيل و مش بس كده لأ ده هيعرف كل الناس انه متحرش و كل ده اتقلب 180 درجة لما قدمت فيه شكوى.
ليه قررت متكلمش لمدة سنة كاملة ؟
لأن عمرو محامي معروف، له دواير كبيره بتدعمه، عشان مكنتش هتسمع، عشان كنت هعيش في حصار من الهجوم و التكذيب عشان هو قد ايه برئ و ساذج، عشان كنت قدمت شكوى لمقر عمل عمرو السابق ” المفوضية المصرية للحقوق و الحريات ” و اللي اخدت قرار بوقفه عن العمل و من ثم فصله بعد تحقيق داخلي من مديرينه، بعد فصل عمرو طلبت ان يتعمل تحقيق من لجنة مستقله عشان ميكونش في اي تجني عليه و عشان ميشككش في قرار فصله أو في الشكوى اللي قدمتها ضده و هو كمان طلب تحقيق لإثبات برائته.
و بالفعل تكونت اللجنة من ٣ عضوات انا اختارت منهم عضوة و هو اختار عضوة و بالتشاور بينهن تم اختيار العضوة التالته. و لذلك تحفظت تماما على اني اتكلم عن الواقعه أو اكتب عنها احتراما لمسار التحقيق و عشان ميقولش اني بضغط على لجنة التحقيق و عشان ميكونش في اي سبيل لأي شخص انه يشكك في الواقعة لأني مكنتش متحمله اي شئ.
ايه اللي حصل اثناء التحقيق ؟
التحقيق بدء في أغسطس ٢٠٢٠ يعني من سنة بالضبط و خلال السنة دي عمرو اتواصل مع أصدقاء ليا و اشخاص بيني و بينهم شغل و اشخاص من دواير أصدقائي في الأول عشان ” نقعد نتكلم و نتفاهم ” على حد قوله.
و بعد كده بقا يوصلني من ناس ميعرفوش عن الواقعة شئ كلام بيتقال عني_على لسان عمرو_في قعدات طويله عريضه زي اني شر**م**وطة، اتنشن هور، عندي أزمة نفسية و بكره كل الرجالة، معقده و بتهم اي حد بالتحرش، لدرجة ان شكك في واقعة تحرش اتعرضتلها سنة ٢٠١٩.
لكم ان تتخيلوا اني اتعرضت لعنف جنسي و عنف نفسي و شخص استخدم مرضي النفسي ضدي عشان يوهمني اني مجنونه وان الكلام ده محصلش و فضلت سنة كاملة مش قادرة احكي عشان فعلا كنت خايفة و بتكلم مع لجنة التحقيق و بحكي مره واتنين وتلاته و كل مره كنت بتعب لاني مضطرة افتكر و احكي تفاصيل خاصه في حياتي بيني و بين شخص كنت مرتبطة بيه و كنت بقول انه ثقه وكان المحامي بتاعي.
فوق كل ده و قصاد سكوتي عمرو قرر يحكي الواقعه بتخيله هو ليها و بتفاصيله هو و لدايرة اشخاص اختارها بعنايه عشان مش بس يصدقوه لأ عشان كمان ينشروا بالنيابة عنه فتكون النتيجة انه يتسمع وانا متسمعش انه يتصدق وانا اتكدب عشان مقررتش احكي ولا حد من اللي سمعوا حكايته قرر يسألني او يسمع روايتي.
ايه اللي جد و خلاني احكي؟
ان عمرو كتب بوست من حوالي إسبوع بيقول فيه انه بيتعرض لعنف و انتهاكات من بنت بتتهمه بالتحرش و الترانس فوبيا اللي هي أنا_مكتبش إسمي_ لكنه يقصدني و من اللجنة اللي_بناء على كلامه_ متحيزه و بتقصر في اصدار نتيجة التحقيق رغم اختياره للجنة دي زيه زيي دون أي تفضيل ليا.
و ان امبارح نتيجة التحقيق طلعت و أكدت بناء على تقرير اللجنة:-
_قيام عمرو في العلاقة بمايمكن تسميته تجاوز واضح للرضائية بين الطرفين.
_استخدام عمرو لمرضي النفسي ضدي و محاولة تشكيكي في نفسي لأبتزازي نفسيا.
_ تسبب عمرو في اني اكون محاصره طول مدة التحقيق بروايات و نميمة بتطاردني في دواير شغلي و أصدقائي و كأنها تحقيق خارج التحقيق.
انا النهاردة بس هعتبر نفسي ناجية بجد….ناجية من عنف عمرو، من استغلاله مرضي النفسي لتشكيكي في نفسي، ناجية من تكديب صحابه و دوايره و من نشرهم لروايته في كل الأوساط، ناجية من لوم بعض أصدقائي ليا اني قدمت شكوى، ناجية من الخوف اللي عيشت فيه من اني اتكلم أو احكي.. انا النهارده قررت أحكي و يمكن متصدقش بس اللي متأكده منه إني هتسمع.
#ملك_الكاشف
للمزيد..
ملك الكاشف أول شاب متحول جنسيا بمصر يدافع عن بسنت فتاة ميت غمر
صفحتنا الرسمية فرندة – farandh
