لماذا علاقة توأم الشعلة طويلة وصعبة ؟
أولاً توائم الشعلة تولد في العائلات اللي بها ظلم كبير للأبناء ووعي منخفض، وطاقات سلبية كثيرة.
ثانياً اننا زي ما بنورث الصفات الجسمانية زي لون العين والبشرة والشعر والطول.. الخ.. بنورث ايضا الصفات الروحانية
زي المواهب والافكار الايجابية والافكار السلبية والامراض… الخ
لان الروح ليها DNA خاص بيها زي الجسد.. وبما اننا توائم شعلة.. فإحنا ورثنا كل الافكار السلبية اللي في عيلتنا وعلي طول خط الاجداد..
متخييلن كم البلوكات اللي ورثناها من جدود اجدادنا؟؟
والمطلوب مننا نتحرر من كل البلوكات اللي ورثناها من جدود اجدادنا.. علشان روحنا ترتاح.. وكل ده محتاج شغل علي النفس كتيررر.. مش بس شغل.. انا محتاج اكتشف الاول ايه اللي ورثته من عيلتي.. علشان اقدر اتخلص منه.
الجميل بقا ان علماء الطاقة اكتشفوا ان بعد التشافي ال DNA بتاعنا بيتغير.. وبالتالي نسلنا بيتولد بوعي اكبر وبإهتزاز وطاقة ايجابية أعلي.. وده من نعمة ربنا علينا.. وهو ده دورنا كتوائم شعلة التشافي.. علشان نتخلص من بلوكات عيلتنا.. ويطلع نشأ واعي.. واكتر ايجابية.
ثالث حاجة صعوبة الرحلة بتكمن في التواصل الروحاني بينا وانعكاس المرايا..
يعني مثلا لو انا في علاقة مع شخص تاني غير توأمي وبحبه.. ومثلا الشخص ده انا مش متقبلاه.. وفيه حاجات كتيررر مش عجباني فيه.. وعايزاه يتغير.. بس انا مش قولتله.. وقتها الشخص ده استحاله يدرك اي حاجة جوايا.. وبالتالي العلاقة بتفضل مكملة عادي.. ونفس الكلام لو الشخص ده شايفني متحكمة ومسيطرة وبيحبني.. وقتها انا مش هادرك اني متحكمة.. ولا هعرف هو شايفني ازاي؟
اما بقا في علاقة توأم الشعلة لو انا مش متقبله توأمي.. ومن جوايا عايزاه يتغير.. ورغم ذلك بعامله معاملة حلوة وبهتم بيه.. وهو شايفني متحكمة ومسيطرة.. في نفس اللحظة هو بيحس باللي جوايا وبيهرب من تحكمي.. وانا كمان بحس باللي جواه وادرك اني متحكمة.. رغم انك لو سألت
الهارب..
انت ليه هربت؟
هو مش هيعرف يجاوب.. لانه مش مدرك ولا واعي هو ليه هرب.. هو كل اللي حسه مشاعر خوف.. ودي نفس المشاعر اللي بيحسها لما حد يرفضه(رغم انه مش مدرك لده بس هو اتبرمج علي كده لما يخاف يهرب) .. فلحظة ما بيحس بالخوف.. رد فعل طبيعي انه يهرب.. حتي لو كلمتيه وقولتيله انا بحبك ياله نرجع.. ومن جواكي رفضاه.. هيرفض حبك.. وهينكر مشاعره وعلاقتكم.. رغم انه بيعشقك.. وهيبعد عنك.. وهيبقا مش عارف ليه بيبعد وبينكر علاقته بيكي؟
والاغرب انه بيندم بعد كده علي رفضه ليكي.. ويقعد يلوم في نفسه.. ويتمني ترجعي تكلميه تاني.. ولما تكلميه نفس السيناريو يتعاد تاني.. الخ
نفس الكلام علي المطارد.. هو اتبرمج لما يحس بخوف وعدم أمان يتحكم.. وهو كمان مش مدرك لده.
الهروب والتحكم انظمة دفاعيه.. بنحمي بيها نفسنا لما بنخاف.. وكل واحد حسب برمجته.. بمعني الهارب متبرمج علي الهروب لما بيقابله حاجة بتخوفه (الرفض) .. والمطارد متبرمج علي التحكم لما بتقابله حاجة تحسسه بالخوف(عدم الامان) … كل واحد فينا استخدم انظمته الدفاعية في العلاقة.. من غير ما ناخد بالنا اننا بنأذي الشخص التاني.. وهو ده هدف العلاقة اننا نأذي بعض.. ونهدم انظمة بعض الدفاعية.. علشان روحنا تتحرر من الخوف وعدم الامان.
اتسألت السؤال ده كذا مرة
ليه رغم توازن المطارد وتقدمه في التشافي الهارب لسه مش رجع؟
لانك لسه مش متقبلاه.. لسه جواكي غضب من ناحيته.. هو الحقيقة مش غضب واحد.. لا دول اتنين..
الاول سببه انه جرحك وخانك.
التاني سببه انه مش بيحاول يصالحك او يعمل حاجة علشان يصلح علاقتكم.. وده مضايقك جدااا.. يمكن اكتر من الخيانة نفسها.. لان نفسك يعمل حاجة علشانك.. من لحظة ما عرفتيه وانتي مستنياه ياخد اكشن ناحيتك.. وهو للاسف واقف مكانه.. وده انعكاس ليكي انك مش بتحبي نفسك.. وانك في وضع انتظار.. اي تعلق
الهارب حاسس بكل اللي جواكي من غضب.. وده رعبه جداااا.. هو مستني الغضب اللي جواكي يهدي.. مستنيكي تحبي نفسك.. مستنيكي تنسي اللي هو عمله وتسامحيه(والحقيقة المطارد استحالة ينسي او يسامح الهارب.. إلا لما الهارب ينسي الاول ويسامح نفسه) علشان يطمن ويعرف يرجع.
في اكتوبر اللي فات انجبرت اكلم توأمي.. وهو كمان انجبر يرد عليه.. سالته سؤال وقولتله علاقتنا اخرتها ايه؟
مش رد علي طول ولا قرأ المسج.. وقعد يفكر .. وكان واصلي مشاعر حب ولهفة وسعادة مخلوطة بمشاعر وجع..( لاني وقتها كنت مفعله عنده ألم الرفض طاقيا.. وكنت واعيه لده.. ومش عايزه اكلمه.. بس انجبرت اكلمه.. وكلمته خصوصا لما حسيت بمشاعر خوف.. فقررت اواجه مخاوفي واكلمه)
قبل ما يرد عليه حلمت اننا اتخطبنا.. فأدركت انه عايز يرجع.. ولاقيته بيتخيل اننا رجعنا ومع بعض.. فقولتله عبر التواصل الروحاني .. لا مش ترجع.. انا مش عايزاك .. ولاقيته بعدها رد علي الشات..
رد عليه بسؤال مش بإجابة.. وقالي علاقتنا ازاي؟
رد عليه وروحه كانت بتنزف من الوجع.. لانه بيقول كلام غير اللي حسه.. فأشفقت عليه من الوجع.. وقررت انهي الشات.. وحسيته حذر معايا جدااا في كلامه.. علشان مش يقولي حاجة افتكر منها ان العلاقة انتهت..
لانه مش عايزها تنتهي.. عايزها تبدأ وتاخد مسارها الصحيح.. فوقفت الشات معاه.. وغيرت رقم فوني وبعدت عنه.. لانه مراقبته ليه علي الواتس.. بتعصبني وبتفقدني توازني.. وبتخليني مش عارفة اركز علي نفسي.
هو أنكر لانه حس برفضي ليه.. وانا فعلا كنت رافضة رجوعه.. لاني عايزاه هو اللي يرجع مش انا اللي ارجعله.. لما انكر وقتها ادركت اني مش بحب نفسي.. واني عايشه في دور الضحية.. لانه ظلمني للمرة المليون.. ومش ندمانة اني كلمته بل بالعكس.. لانه عكسلي عيوبي في الفترة دي اللي مش كنت واخده بالي منها.. وهي اني عايشة في دور الضحية.. خصوصا لما لاقيت علاقتي بأهلي رجعت تبوظ تاني.. وانا مش كنت فاهمة ايه اللي بيحصلي.. وحسيت وقتها اني رجعت لنقطة الصفر.
التشافي في ظل وجود التوأم معاكي بيسهل عليكي كتيررر.. خصوصا لما تكونوا في نفس الوعي ومدركين حقيقة توأم الشعلة.. اما التشافي بعيد عن التوأم بياخد وقت اطول.. لان طول الوقت انتي مش عارفة ايه المشاكل اللي عندك علشان تشتغلي عليها.. محتاجة توأمك علشان يعكسهالك.. وتكتشفيها.
علشان كده علاقة توأم الشعلة صعبة.. لازم روحنا وافكارنا تكون متوافقه مع هدفنا.. عايزاه يرجع لازم تكوني حابه رجوعه.. ومتقبلاه بكل مافيه.. من غير تعلق.. علشان يحس بحبك وتقبلك ليه.. وروحه تطمن.. غير كده استحالة يرجع.
التواصل الروحاني بينا هو اللي خلانا ندرك حقيقة مشاعر الاخر.. لولا التواصل الروحاني عمري ما كنت قدرت افهم واحس بتوأمي.. واكتب كل البوستات دي علي مدار تقريبا ٣ سنوات.
والتواصل الروحاني ايضا هو اللي صحي وعينا.. وخلانا ندرك حقيقة المرايا.. وان توأمي انعكاس ليه.. وان كل عيوبي اللي مش عارف اغيرها.. واللي ممكن اكون مش مدركها اصلا.. هي مميزات توأمي.
الحقيقة ان المرايا او الانعكاس ده موجود عند كل البشر مش توائم الشعلة بس.. بمعني ان العالم الخارجي انعكاس لعالمي الداخلي.. بس انا مش ادركت الانعكاس إلا لما قابلت توأمي.. وروحي صحيت.
رابع حاجة ان صعوبة الرحلة بتكمن في غرابتها.. بمعني احنا بنعيش وبنمر بحاجات مافيش حد نعرفه عاشها قبل كده.. ولا حتي احنا قرأنا عنها قبل كده.. فده بيخلينا عايزين نحكي ونتكلم مع حد.. علشان مش نحس اننا مجانين او عايشين لوحدنا ومنعزلين.. عايزين نشارك حد الجنون اللي احنا عايشينه.. وفي مننا بيحكي.. بس مافيش حد بيصدقه.. وبيتخض من كلامه.. وممكن يتهمه بالجنون او المس الجني.. وده شئ طبيعي.. لانك بتحكي عن تجربه واشياء محسوسه مش ملموسه.. محسوسة يعني مافيش حد هيحسها غيرك.. حاجات تتحس مش تتشاف.. والناس اصلا غير واعيه.. وغارقنين في العالم المادي.. مع ان لو قولتلهم عندك صداع.. هيصدقوك رغم انه الالم محسوس.. مش ظاهر ولا ملموس.. بس هما جربوه ومروا بيه كتيررر.. اما توأم الشعلة مافيش حد جربها.. ولا حتي سمعوا عنها.
غرابة توأم الشعلة مش بس في ندرتها.. وانما في كل حاجة فيها.. تواصل روحاني.. تخيلات جنسية.. جنس طاقي.
يعني ايه شخص يلمس جسمي ويعمل معايا علاقة جنسية.. من غير حتي ما يلمسني او يشوفني؟
يعني ايه اتكلم مع حد واحس بيه رغم كل المسافات اللي بينا.. ورغم ان مافيش اي وسيلة تواصل تليفون.. او موبيل ؟
ما فيش حد يصدق الهبل ده.. لان كل الحاجات دي اتعودنا نشوفها في العالم المادي.. نتكلم في تليفون او في الموبيل.. اي حاجة بخلاف كده تبقا غير مرئية.. وتصنف تحت بند المس الجني او المرض النفسي.. هو ده العالم المادي اللي احنا عايشين فيه.
وده هدف توأم الشعلة.. القضاء علي العالم المادي البحت.. من خلال ظهور ظواهر خارقة للتفكير المادي.. زي التواصل الروحاني والتخيلات الجنسية والجنس الطاقي.
والهدف ايضا من غرابة العلاقة.. هو الوحدة واللجوء إلي الله.. وادراك ان مافيش حاجة هتنجيك غير ربنا.. وده هتدركه بعد ما تلجأ لأصحابك وأهلك.. وتحكيلهم عن اللي انت بتعيشه.. ويتهموك بالجنون والسحر.
علاقة توأم الشعلة غريبة وصعبه جداااا.. لانها بتدور علي الروح.. وبلوكات الطفولة.. وبلوكات جدود الاجداد.. المطلوب منك انك تتقبلها.. وترضي بالاختبار.. وبقضاء ربنا وقدره.. وتقرب منه لانه الوحيد اللي هيقدر يساعدك.. ويخرجك من محنتك.. هي الحقيقة مش محنة.. هي منحة عظيمة.. وشرف كبير لينا.. وفرصة تانيه للولادة من جديد.. لما تسلم وترضي.. وقتها هتقدر تستمع بالرحلة.. وهتحمد ربنا علي التجربة والوعي.. والاختبار هينتهي بسرعة.. وربنا هيعوض صبرك خير.
