تناسخ الأرواح والفرق بين المسخ والرسخ والفسخ

تناسخ الأرواح والفرق بين المسخ والرسخ والفسخ

ماذا تعرف عن تناسخ الأرواح ؟

-التناسخ : هو انتقال النفس من بدنها اللي چانت بيه ، إلى بدن ثاني ، هذا البدن الثاني مرة يكون بدن إنسان او حيوان او نبات ، وتظل النفس كل مايتعب بدنها ويموت تتنقل إلى بدن اخر وهكذا ..
-إشوكت ظهرت مسألة التناسخ ؟
-ظهرت من قديم الزمان ، فأول من أعتقد بيهه هم قدماء المصريين ، وتابعوهم الكنعانيين والفينيقيين ..
-منو من الأديان تعتقد بالتناسخ ؟
-الهندوسية والبوذية وغيرهه ..
-حلو ، وشنو أنواع التناسخ ؟
-اكو نوعين من التناسخ : ملكي وملكوتي ..
-شنو التناسخ الملكي ؟
-الملكي يعني الدنيوي ، وهو تعلق النفس بجسم ثاني وره مايموت الجسم الأول ، وهذا الشي يصير بالدنيه مو بالآخرة ..
-جيد جدا ، وهذا التناسخ الملكي هم بيه أنواع ؟
-طبعا ، يگولون : اكو نوعين من التناسخ الملكي : نزولي وصعودي ..
-وشنو قصدهم بالتناسخ النزولي ؟
-هو ان تتعلق النفس وره مايموت الجسم الاول ، بجنين او حيوان او نبات او جماد ، وسموه نزولي لان هذني الأشياء اللي انتقلت الهن النفس، كلهن اقل مرتبة من الجسم الأول ، وهذا التناسخ النزولي هم بيه أنواع ..
-ماشاء الله ، أنواع هواي صارت عدنه ، نوع طاب بنوع ، على العموم ، شنو أنواع التناسخ النزولي ؟
-التناسخ النزولي بيه أربع أنواع ..

أولا : النسخ ، اللي هو انتقال النفس بالموت من بدن مادي إلى بدن مادي آخر ، بس بهاي الدنيه مو بالآخرة ..

ثانيا : المسخ ، اللي هوه تغير صورة الممسوخ وشكله إلى صورة حيوان او حشرة مع بقاء نوعه الإنساني ..
-شلون يعني ؟
-يعني الإنسان من ينمسخ ، يتحول شكله فقط إلى شكل قرد مثلا ، اما حقيقته الإنسانية فباقية ، يعني هوه إنسان بس شكله قرد ..

ثالثا : الفسخ ، اللي هوه انتقال النفس بعد الموت إلى شجر ونبات ..

رابعا : الرسخ ،اللي هو انتقال النفس إلى حجر وجماد ..

-گلت إنو التناسخ الملكي بيه نوعين : نزولي وصعودي ، وسولفت عن النزولي وانواعه ، وهسه أريدك تسولفلي عن التناسخ الصعودي ، وتگولي شنو هوه ؟
-التناسخ الصعودي ، هو ترقي النفس من درجة سافلة إلى درجة عالية ، يعني النفس في بداية تكوينهه چانت نبات بعدين صارت حيوان ، بعدين صارت إنسان إلى أن توصل إلى درجة المجردات مثل الملائكة ، وبعدين تترقى اكثر وتصير عقل مجرد ..الخ ..
– هاي كل نفس توصل لهاي الدرجات ؟
-لا مو كل نفس ، النفس الزينة والحبابة تترقى إلى الأشياء الحلوة ، والنفس الخبيثة همينه تترقه وتتطور ، بس بطريق التسافل ، يعني تتحول من إنسان إلى حيوان إلى شيطان وغيره ..
-ممتاز ، اتذكر في بداية كلامك گلت : ان التناسخ بصورة عامة ينقسم إلى تناسخ ملكي وتناسخ ملكوتي ، وسولفنه هواي عن التناسخ الملكي وعن أنواعه ، بس ماگلتلي شنو التناسخ الملكوتي ؟
-التناسخ الملكوتي هو بكل بساطة : انتقال النفس بالموت من البدن الدنيوي الى البدن الاخروي ، يعني يوم القيامة ، فإذا كانت النفس حبابة بالدنيه فراح يكون شكل جسمهه بالآخرة حلو ومرتب ، واما اذا چانت النفس بالدنيه خبيثة ووكحه ، فراح يكون شكل جسمهه بالآخرة قبيح ..
-زين ، شنو راي الإسلام بالتناسخ ؟
-الإسلام يرفض التناسخ ، والمسلمين عدهم أدلة نقلية (قران وسنة) وأدلة عقلية على بطلان التناسخ ..
-اكو بعض الطوائف الإسلامية تؤمن بقضية الرجعة ، اللي هيه رجوع بعض الأموات إلى الدنيه مرة ثانية ، هاي الرجعة مو هيه نفس التناسخ ، شنو الفرق ؟!!
-يگولون : اكو فرق بين السما والگاع بين الرجعة وبين التناسخ ..
-شلون ؟
-لان التناسخ بيه شغلتين ماموجودات بالرجعة ، وهذا الشي هو اللي يميز التناسخ عن الرجعة، والشغلتين هما :

أولا : التناسخ بيه تعدد للابدان ، يعني النفس يومية طافرتلهه بجسم جديد ، بينما في الرجعة يرجع نفس جسم الشخص الميت وره ماترجع روحه ..

ثانيا : والتناسخ ، ترجع بيه النفس من درجة عالية إلى درجة دانية بالدنيه ، بينما في الرجعة تبقه النفس على مقامهه السابق وماتنزل وتتسافل ..
-طيب ، العلم شنو رأيه بالتناسخ ، يعني يثبت وجود التناسخ لو ينفيه ؟
-العلم بصورة عامة مايثبت التناسخ ، بس اكو بعض المحاولات من قبل بعض العلماء لإثبات التناسخ ، اعتمادا على بعض الشهادات من بعض الناس ، بس بصورة عامة التناسخ ماثابت علميا ..
-حلو ، زين ، اذا التناسخ ماثابت علميا ؛ چاشنو اللي خله بعض الناس تعتقد بيه ؟
-الجواب هو :

اولا : اكو ناس ماتؤمن بيوم القيامة ، وشافو اكو ظلم جاي يصير بالدنيه ، فگالو : لازم اكو حياة ثانية (دنيوية ) يتحاسب بيهه الظالم وينصف بيهه المظلوم ، وهذا الشي مايصير الا بالايمان بالتناسخ ..

ثانيا : حتى يبررون خلق بعض الأطفال المشوهين والمعاقين ، فگالوا : ذولة الأطفال المشوهين والمعاقين چانوا مو زينين بحياتهم السابقة ؛ والله عاقبهم بهاي الحياة فجعلهم مشوهين ومعاقين ..

ثالثا : بعض الناس من يفشل بحياته ، يگوم يتمنى ويتخيل وجود حياة ثانية يعوض بيهه فشله بالحياة الأولى ..

رابعا : تبرير الاعمال العنيفة إللي يسويهه بعض الناس ، يعني مثلا ، گبل بزمن الجاهلية اذا انكتل واحد من قبيلة معينة ، يگولون : راح تنتقل روحه بجسم طير يشبه البوم اسمه (الهامة ) يبقى هذا الطير يحوم حول الكبر ويصيح : اسقوني ..اسقوني ..يعني يا ابناء قبيلتي آني عطشان وراح ابقى عطشان الى أن تاخذون بثاري !!
فچان هذا الشي مبرر للقبيلة في انتقامهه الشنيع من القبيلة اللي كتلت ابنهم ..

والحمد لله ..

باسم الشبلاوي

للمزيد..

بصور مثيرة| عودة دينا أنور لـ الفيس بوك بعد يومين من غلق حسابها (صور)

صفحتنا الرسمية فرندة – Farandh