جرائم غامضة | سر مقتل أشهر مغنيين الهيب هوب بنفس الطريقة
سنة ١٩٩٦ حصل حاجة هزت الولايات المتحدة كلها، وبعدها حصل حاجات كتير ملهاش تفسير ليومنا ده.
اغتيال مغني الهيب هوب الشهير “توباك شاكور” واللي حصل ده كان في مدينة لاس فيجاس الأمريكية، لما ضرب عليه نار من مصدر مجهول، وقتها كان “توباك” في عربيته.
الشرطة كالعادة كان مهمتها صعبة جدًا، عشان اللي اتقتل مش مواطن عادي، لا ده مغني مشهور وليه معجبين كتير، لكن القاتل كان ذكي جدًا، ومسابش أي دليل وراه، والشرطة مقدرتش توصل لأي حاجة.
لكن أصحاب توباك اتهموا خصمه، مغني الهيب هوب كريستوفر والاس، واللي كان مشهور بلقب B.l.G ، واتهامهم ده مكانش من فراغ، لكنه كان بسبب الشكوك اللي صرح بيها توباك نفسه.
وقال إن كريستوفر والاس هو اللي كان ورا محاولة اغتياله الأولى، واللي لحسن حظه فشلت، والحادث ده كان في نوفمبر سنة ١٩٩٤، ساعتها B.l.G نفى عن نفسه تمامًا تهمة قتل توباك.
ولكن بعدها بمدة اتعرض المغني B.l.G لحادث واتصاب في رجله، وبسبب كده بقى بيمشي بعكاز، لكن في مارس سنة ١٩٩٧، كان B.l.G ماشي بعربيته ورايح عند مقر حفلته الغنائية، وبسبب إشارة المرور اللي نورت بالأحمر؛ وقف B.l.G بالعربية جنب متحف بيترسن في مدينة لوس أنجلوس، اتفتح شباك العربية اللي جنبه عشان يخرج منها ٦ رصاصات من مجهول على B.l.G وللأسف كان مات قبل حتى ما يتنقل للمستشفى.
وبما إن الحادث ده كان بعد مقتل توباك بفترة؛ الناس قالوا إن أصحاب توباك انتقموا من B.l.G بقتله، لإن الأخير قتل الأول بسبب العداوة والمنافسة اللي كانت قايمة بينهم.
زيادة على كده الشكوك اللي طاردت توباك بإنه على علاقة بزوجة B.l.G ، واللي توباك صرح بيها في أغانيه.
لكن كل اللي فات كانت مجرد إشاعات متثبتتش بالأدلة. الشرطة قفلت قضية أشهر نجمين من نجوم الهيب هوب، واتقيد الحادثين ضد مجهول.
ممكن تسألني وتقولي طب مش كان فيه عداوة بينهم، وممكن جدًا يكون B.l.G هو اللي قتل توباك؟
هقولك مش بالبساطة دي، لان الموضوع طلع أغرب من كده.
بنفس طريقة القتل دي، اتقتل مغني الراب ستاك بندليس، في ١١ يونيو ٢٠٠٧.
وكمان بعد ٨ سنين اتقتل ليونيل بيكنز، واللي كان مشهور باسم تشينكس في ١٧ مايو سنة ٢٠١٥، بعد ضرب نار عليه من عربية في منطقة كوينز بولاية نيويورك.
ولغاية دلوقتي ورغم إن طرق القتل متشابهة، يعني ببساطة ممكن نقول هو قاتل واحد، أو جهه واحدة هي السبب وراء الاغتيالات دي؛ إلا إن الشرطة مقدرتش تعرف القتلة، أو القاتل بمعنى أصح، وزي ما فيه صلة بين مقتل توباك و B.l.G ، الشرطة متأكدة إن فيه صلة بين مقتل تشينكس وبندليس.
كتبها/ خالد فودة
سلسلة جرائم غامضة
للمزيد..
فيلم الناصر صلاح الدين | هل غالط يوسف شاهين التاريخ؟!
صفحتنا الرسمية فرندة – Farandh
