الريش امه ستار جبار حلو زعيم الصابئة المندائيين .. من هم وما عبادتهم ؟!

الريش امه ستار جبار حلو زعيم الصابئة المندائيين .. من هم وما عبادتهم ؟!

الريش امه ستار جبار حلو زعيم الصابئة المندائيين .. من هم وما عبادتهم؟!

انتشرت هذة الصورة على مواقع التواصل الاجتماعي Facebook  Twitter بمناسبة زيارة البابا فرانسيس التاريخية للعراق.

وتسائل رواد منصات السوشيال ميديا عن سبب جلوس هذا الرجل بهذة المهابة والعظمة ومن هو؟!

صاحب الصورة هو زعيم الدين الرابع السماوي او نقدر نقول “الرسالة الأولى” الريش امه ستار جبار حلو زعيم الصابئة المندائيين.

 

والصابئة اهل كتاب بوصف القرآن في ثلاث مواضع، منها سورة البقرة : إِنَّ الَّذِينَ آمَنُوا وَالَّذِينَ هَادُوا وَالنَّصَارَى وَالصَّابِئِينَ مَنْ آمَنَ بِاللَّهِ وَالْيَوْمِ الْآخِرِ وَعَمِلَ صَالِحًا فَلَهُمْ أَجْرُهُمْ عِنْدَ رَبِّهِمْ وَلَا خَوْفٌ عَلَيْهِمْ وَلَا هُمْ يَحْزَنُونَ”.

 

للمزيد..

هل تنبئ الإمام محمد ماضي أبو العزائم بموت موسوليني؟!

 

 

الريش امه ستار جبار حلو زعيم الصابئة المندائيين .. من هم
الريش امه ستار جبار حلو زعيم الصابئة المندائيين .. من هم

 

1- على الرغم من ان الصابئة هم الدين السماوي الاول قبل الاديان الثلاثة، بس نقدر نقول بكل بساطة ان الصابئة اكثر ناس مريحة دماغها من كل حاجة، مجموعة كدة عايشين مع نفسهم ومبيتجوزوش من اديان تانية ولا بيقبلوا تبشير في دينهم.

 

2- الصابئة دول اخدوا الايمان من جذوره اوي، يعني مآمنوش بسيدنا موسى وسيدنا المسيح وسيدنا محمد لأ، دول آمنوا بسيدنا آدم نفسه، يعني الاصل في الايمان هي شريعة ابو البشر آدم عليه السلام، عشان مش لسة هنتخانق وكدة، يعني يعتبر اقدم المؤمنين برسالة ربنا، من وقت نزولها.

 

3- النبي الاهم في مسيرتهم هو سيدنا ابراهيم، يعني هما اهل كتاب حنيف، مآمنين بالجد الكبير على طول، وقصة ايمانهم اللي كانت في القرآن للقوم اللي كانوا بيعبدوا النجوم وسيدنا ابراهيم حاورهم، وصبئوا عن دين اجدادهم وآمنوا بسيدنا ابراهيم وهاجروا معاه، ومن ساعتها بقا لا مسيحية ولا اسلام ولا سنة ولا شيعة ولا ارثوذوكس ولا كاثوليك.

 

4- مؤمنين بربنا الواحد، توحيديين، بس مبيقولوش بقا “لم يلد ولم يولد” لا بيقولوا “الذي لا اب اكبر منه”، ملوش اب قبليه، يعني ربنا واحد من الاصل خالص، وكمان مؤمنين بالانبياء بس مش كلهم، يعني مؤمنين باللي معليهومش كلام اوي، انبيائهم “آدم، شيث، نوح، سام بن نوح، زكريا ويحيى”.

 

5- لو حد صابئي اقتنع بدين من التلاتة التانيين، بيهنوه وبيفرحوا بيه، لان معندهومش حتة الكفر من دين لدين خصوصا لان كل الانبياء اللي بعد كدة يبقوا احفاد النبي بتاعهم، واللي يهمهم ايمان الشخص بربنا بس، عشان كدة شعارهم اصلا صليب عليه رداء ابيض بيسموه الدرفش، الدرفش ده مختلف عن الصليب المعروف هو بيرمز للاتجاهات الاربعة وعليه راية بيضاء رمز راية اداها ملاك لسيدنا ادم بعد نزوله الارض، والرداء الابيض رمز ليهم، ولا اسود ولا اخضر، ابيض، ومكانهم المقدس اي معبد يتبني على اي نهر، بيسموه المندي، عشان كدة اسمهم “صابئة مندائية”.

 

6- عندهم صلاة ووضوء عادي زي المسلمين، بس هما فجر وضهر وعصر بس، ومفيش صلاة جماعة في الشريعة ولا قدّاس ولا اي جماعات، اللي عايز يصلي يصلي، وانتا بينك وبين ربنا بقا.

 

7- عندهم صيام، بس بيصوموا عن اللحمة بس، اصل ليه نبطل اكل عموما؟ احنا بنصوم عن اللحمة بس، والصيام كتير وطول السنة، وفيه جزء بيصوموا عن الشهوات كلها، الاكل والشرب في اوقات معينة، بس الغالب بيكون صيام لحمة.

 

8- نفس الشريعة اللي نزلت على سيدنا ابراهيم هما لسة بيتبعوها على شكلها كدة، مغيروش فيها، تجنبا للتحريف والاضافات والحاجات دي، يعني بقالهم من الالفية التالتة قبل الميلاد على نفس الدين، ونفس الشريعة مبتتغيرش، على حد قولهم يعني.

 

9- معندهومش كهانة، جو متجوزش ده مش موجود، بل ان الحرام انك متتجوزش، يعني عشان تكمل دينك لازم تتجوز، الدين بيؤمرك بده، لو متجوزتش ده حرام، لازم تتجوز.

 

10- عندهم كمان تعميد، بس بيسموه “صباغة” وبيكون من نهر جاري خصوصا دجلة والفرات عشان العراق وعشان ده موطن سيدنا ابراهيم، وبيقولوا ان يحيى بن زكريا اتصبغ وكذلك المسيح عيسى بن مريم، واتاخدت في المسيحية بعد كدة لكن اصلها صابئي، دا على حد وصفهم يعني.

 

11- عندهم صدقة وزكاة، لكن اهم شرط فيها انها تكون سرية، لو حد عرف بتبطل وكأنك معملتش الصدقة دي، عشان نفسية اللي بياخدها، وعشان دي بينك وبين ربنا، وهي فرض على كل صابئي.

 

12- عندهم كتاب مقدس طبعا زي الانجيل والقرآن، اسمه “كنزا ربا”، وده كتاب كبير هما مؤمنين انه نزل على سيدنا ادم ونزل بعد كدة على باقي انبياؤهم، وعشان ترييح الدماغ فالكتاب متقسم اجزاء وكل جزء اسمه “كتاب” لوحده، وكل كتاب بيتكلم عن حاجة في الشريعة بتاعتهم، وهي نقلا عن الواح طينية قديمة ايام جدودهم وقبل اختراع الكتابة على الورق، ايام اللفائف والالواح.

 

13- الحرام عندهم زي عندنا وعند اخواتنا من الاديان التانية، بيزودوا عليه تحريم السحر بشكل مطلق، وتحريم البكاء على الميت، وتحريم تلويث الطبيعة، والطلاق، والغريبة هي تحريم الختان رجالة ستات، يعني اصل عندك دين بيختن رجالة ودين بيختن ستات، هما محرمينها كلها من الاصل.

 

14- عندهم آية بتحرم العزوبية تحريم مباشر، حرام تبقا سينجل، الآية بتبدأ : أيها العزاّب. أيتها العذارى، أيها الرجال العازفون عن النساء، هل وقـََفتم على ساحل البحر يوماً ؟ هل نظرتم إلى السَمك كيف يَسبح أزواجاً؟ هل صَعدتم إلى ضفةِ الفرات العظيم؟ هل تأملْتم الأشجار واقفة تشرب الماء على ضِفافهِ وتـُثمِر؟ فما لكم لا تـثمرونْ؟

 

15- بيتكلموا عربي وكل حاجة، بس لغة الدين هي لغة اجدادهم القديمة اللي هي اللغة الآرامية الشرقية، تجنبا للتحريف او اللعب في الكلام فضلوا على لغة الاجداد لحد النهاردة، فالنصوص الدينية والصلاة وكل ده بيكون باللغة الآرامية بس.

 

16- تجنبا للاضطهاد اللي شافوه على مر العصور كونهم اقدم رسالة سماوية على كوكب الارض وكل الثقافات حاولت معاهم قبل الاديان السماوية الثلاثة.

 

قرروا يقفلوا على نفسهم طول التاريخ، عشان كدة مبيزيدوش، بيتجوزوا من نفسهم فا عددهم الافات بس، مطلعش منهم متطرفين لانهم مش دين توسعي او تبشيري، والنص اللي بيؤمنوا بيه بيقولوا انه بيرجع لسيدنا ادم نفسه، تخيل بقا ..

 

17- الصابئية كانت دين اهل القدس قبل المسيحية، ولما بدأ الصراع على الارض دي خدوها من قاصرها وسابوا الارض ومشيوا، راحوا ناحية حران وبلاد الشام، عشان لا حروب بقا ولا اضطهاد ولا قضية، وسابوا اهل الاديان لحد النهاردة بيموتوا بعض لاجل الارض دي.

 

الريش امه ستار جبار حلو

 

1- اكبر راجل دين فيهم هو الريش أمّة، اللي في الصورة ده واللي كلمته ماشية عالكل، تحتيه فيه رتب دينية تانية زي مثلا الحلالي اللي بيمشي في الجنازات واللي لازم يكون متجوز وهو مراهق، وفيه الترميدة والأبيسق وحاجات كتير كدة، وفيه رتبة عالية جدا اسمها الربّاني ودي موصلهاش غير يحيى بن زكريا بس.

 

2- اغلب ابناء الدين دول شغالين شغلانات ثقافية وفي تجارة الدهب، طلع منهم كتّاب ومثقفين كتير جدا، زي ابو اسحاق الصابي، وثابت بن قرة، ولحد النهاردة فيهم اسماء مشهورة كأطباء ومفكرين وشعراء ، ودي حاجة غريبة ان كل ابناء الدين يكونوا كدة، نسبة لعددهم الصغير النهاردة.

 

استقبال السيد ياسر الموسوي ممثلا عن سماحة السيد مقتدى الصدر في مندى الطائفه لدعم المبادره الوطنيه ومحاربة الفساد وإقامة دولة التكنوقراط التي أطلقها سماحته
الريش امه ستار جبار حلو أثناء استقبال السيد ياسر الموسوي ممثلا عن السيد مقتدى الصدر

 

3- اهم عيد عندهم هو عيد “البر ونايا” ولك ان تتخيل لما دين بالقدمية دي هيكون عيد ايه؟ بالظبط، عيد خلق الانسان والارض والطبيعة، اما العيد الصغير عندهم هو عيد نزول سيدنا جبريل للارض، وبيسموه عيد الازدهار.

 

4- من اغرب معتقداتهم هو ايمانهم بالله الواحد، بس مؤمنين بـ 360  كائن تاني مابين كائنات خارقة وملايكة وجنود الله، ودول ملهومش تصنيف او كونهم كائنات معروفة يعني، بس هما تحت ربنا على طول، ومسئولين عن كل حاجة في الدنيا، من الرعد والبرق والمطر الخ.

 

5- اغرب حاجة تانية هي ان الزانية لا تقتل ولا تعاقب، عقابها الوحيد هو الهجر، ولما بتغتسل في النهر ذنبها بيتغفر وممكن ترجع عادي لحياتها الطبيعية، وبيكرهوا اللون الازرق النيلي معرفش ليه، بس هو حرام عندهم، الراجل اللي مبيتجوزش مبيخشش الجنة، عندهم علم التنجيم وبيعرفوا المستقبل من النجوم وحركة الكواكب واظن دي متوارثة عن اديان العراق القديمة.

 

6- الاغرب والاغرب انهم مؤمنون بالسنة الهجرية بتاعت المسلمين، وبيستشهدوا بأنهم تنبأوا في كتبهم بظهور سيدنا محمد، بس هما بردو مش مؤمنين بيه كنبي ليهم، لكنه نبي بردو، فاهم حاجة؟

 

7- اغلب اركان دينهم تشبة الاسلام في حاجات كتير جدا، التوحيد، الزكاة، الصيام، الصلاة، الانبياء اللي المسلمين مؤمنين بيهم، تحريم الخمر والزنا، والايمان بالله واليوم الاخر، شبة المسلمين جدا في ده، وباقي الاديان في اغلب الاركان كمان، وده اللي خلى علماء كتير يعترفوا بدينهم كدين سماوي، واللي يقال ان سعد بن ابي وقاص قبل منهم وآمنهم وعاملهم معاملة اهل الكتاب، وقت فتح العراق والشام.

 

8- عشان تفهم وجة الشبة بين الدين الصابئي والاسلام، لما سيدنا محمد جهر بدعوته، الكفار سمعوا منه، واتهموه بأنه “صبأ” ، لدرجة تشابة الدين ده مع ده، ولكون مصطلح “صبأ” يعني خرج عن الدين في اللغة العربية.

اظنك دلوقتي فهمت الصورة، وعرفت ليه الثقة اللي الريش امه ستار جبار حلو قاعد بيها في المقدمة قدام البابا فرانسيس، وعرفت شوية عن الدين السماوي الرابع المنسي في معارك اصحاب الاديان الثلاثة.

 

للمزيد ..

أين تذهب الروح ؟ هل بعد الحياة حياة أخرى؟ | بارنورمال

صفحتنا الرسمية فرندة – Farandh

الريش امه ستار جبار حلو
الريش امه ستار جبار حلو
شارك المقالة