القواعد ال 40 لزيارة معرض الكتاب | البس كوتشي وبلاش فصال
1- المعرض من 30 يونيو حتى 15 يوليو بمركز مصر للمعارض الدولية
2- إنسي رجلك
3- إنسي إنك تخلص المعرض في يوم واحد
4- خد معاك مياه و أنت رايح
5- الجو هناك حر، في عز الشتا أه عادي.. مابالك بالصيف؟
6- مفيش كتاب مش موجود
7- إنسي رجلك
8- البس كوتشي مريح عشان رجلك ماتدعيش عليك
9- مفيش مفاصلة في المعرض عشان لو متعود على كده
10- لو لسة جديد علي القراءة والمعرض خد حد فاهم معاك
11- إنسي أنك تخلص المعرض في يوم واحد
12- خلي أول يوم إنك تشوف ايه الكتب اللي نزلة وتعمل ليست بالكتب اللي هتشتريها
13- خد معاك ورقة وقلم عشان هتحتاجهم، أو جهز نوت فاضية على موبايلك تكتب فيها.
14- المعرض بيتقسم ٣ أقسام، مكتبات العرض المكشوف، الصالات، سور الازبكية.
15- خد لفة محترمة على كل حاجة في المعرض قبل الشراء، الكتب مش هتخلص لا تقلق.
16. التزم بعد كده بالليست بتاع كتبك
17- إعمل حسابك هتصرف أكثر من اللي إنت محدده لنفسك بحبة حلوين
19- زحمة ملهاش أخر
20- انسى رجليك
21- هات معاك شنطة كبيرة عشان متحتارش هتشيل الكتب ازاي
22- هيفضل عندك إحساس إن كان ممكن تشتري حاجة كمان حتي لو إشتريت 200 كتاب
23- أحسن وقت تجيب فيه الموسوعات والكتب الغالية بيبقى آخر كام يوم من المعرض، الخصومات بتزيد.
24- متروحش مواصلات عشان تعرف تروح بالكتب
25- ممكن متروحش الجيم في أسبوعين المعرض
26- هتقابل ناس أصحابك كتير في المعرض
27- هتتوه يعني هتتوه
28- إنسي إنك تخلص المعرض في يوم واحد
29- المعرض مش للكتب والروايات العربي فقط
30- ممكن تلاقي كتب ومجلات من الأربعينات
31- كل اللي بتدور عليه موجود
32- هتشتري كتب إنت مكنتش عايزها أصلا
33- هتحس بسعادة غريبة ليلة المعرض
34- هتصور الكتب اللي إشتريتها وتنزلها علي الفيسبوك عشان كل الناس بتعمل كده
35- ماتزنقش نفسك في آخر يومين عشان بيبقوا ضرب نار، وأبعد عن الويك اند. يوم في نص الأسبوع الصبح بيبقى مناسب جدًا
36- لو عامل ميزانية محددة لشراء الكتب، قسم الفلوس على كذا يوم، أوعى تشتري بكل اللي معاك ف يوم واحد، هتلاقي كتب طلعتلك من تحت الأرض وعايز تجيبها
37- هتلاقي قاعدة بيانات خاصة بالمعرض تقدر تبحث عن كتاب معين أو مؤلف أو دار النشر وتعرف مكانه وموقعه في المعرض بالظبط، دي موجودة في مكاتب الاستعلامات
38- لو بتحب تقرأ في مجال معين؛ تاريخ، فلسفة مثلًا ركز انك تشوف وتعرف الأماكن اللي بتبيع الكتب اللي انت عايزها، وخد الكارت بتاعهم عشان تعرف توصلهم طول السنة مش في المعرض بس.
39- ركز في المعرض على شراء الكتب اللي مش موجودة في مصر، هتلاقي “صالة اتحاد الناشرين العرب” فيها ٩٠٪ من دور النشر التقيلة قوي، واللي حاجاتهم بتبقى مش موجودة كتير في مصر، ولو موجودة بتبقى غالية، استغل وجودهم في مصر
40 – لو لسة جديد في القراءة، خليك خفيف على نفسك، متجبش مقدمة ابن خلدون مثلاً وتحتاس فيها
معرض القاهرة الدولي للكتاب
للمزيد..
احتياج..مشروع تخرج لـ خالد العجيزي (صور قماش من حياتنا اليومية)
صفحتنا الرسمية فرندة – Farandh
