برطم في سرك| حدوتة ساخرة بقلم رانيا كمال العربي
فيه نوعية كده من الناس بخاف منهم..بحس اني بمجرد ماهديهم ضهري هيفضلوا يبرطموا في سرهم عني.😁
وساعات مش في سرهم.،.ساعات بصوت غير مفهوم علي شكل تمتمات غير مفهومة !!!
يعني مثلا لما تيجي واحدة تساعدني في تنضيف البيت (أم زيكا)
الاقيها طول ماهيا عماله تبرطم..، تدخل البكونة تكنسها وتبرطم…، تنشر غسيل وتبرطم وكلام كده من نوعية : ( الواحد زهق/امتي ربنا يتوب علينا/ حاجة تقرف) ، وبيصاحب البرطمة نفخ وعض وشهيق وزفير من الفم !!
والحقيقه اتعودت لان انا شخصيا بعمل كده كتير..، وانا في الشغل لما يطلع عيني والاقي نفسي مش طايقة نفسي اقعد اقول: (الواحد زهق/ الصبر يارب/ امتي ربنا يتوب علينا) نفس البرطمه بتاعه أم زيكا بالضبط.. ولما اتخانق مع جوزي..ادخل اغسل المواعين وابرطم( صبرني يارب/ استغفر الله/ انا كان مين اللي زقني/ كنتي فين يا لاء لماقلت اه/ الرحمة حلوة)
وجوزي اتعود عالبرطمة بتاعتي، وبيفكر ينتج لي شريط كاسيت بصوتي
اللي يضحك ان حتي ابني الصغير حمزة اللي لسه مطلعش من البيضة بقي بيبرطم هو كمان…
جاي يسألني ببراءة: التاب مكتوب عليه 100٪ بس مفيهوش شحن!!
قلتله بثقة: عادي بيكتب بالغلط انه شاحن وهو اصلا فاضي
سالني بتلقائية: وهو التاب هيكذب ليه؟
قلتله: لا عادي كل الناس بتكذب حتي التابات متاخدش في بالك ، وساعتها إداني ضهره ، وسمعته بيبرطم : ( تاب ايه اللي بيكذب !! هو أي هبل !! محدش بيفهم في البيت ده!! )
حتي إنت يامفعوص مش عاجبك كلامي!!
برطم يبرطم برطمه
طيب هو ليه الواحد اصلا بيبرطم ياجماعة؟؟
يعني هو نوع من انواع التنفيس عن الذات مثلا..فضفضه مع النفس.. فش غل بدل ما نطق..خوف وعدم قدرة علي مواجهة
الاخر لانه لو جرئ كان صارحه بس يمكن باقي لسه عليه وبيفش غضبه مع نفسه وخلاص
وعلي قد ماهو بيريح الواحد لكن بيغيظ لما يتعمل معاه..وبالذات لما اكون بشتري حاجه وعاملة نفسي شاطرة وبفاصل واسمعه يقول أول مايديني ضهره: (زباين تشل)
وساعتها واجهته: لا ده مش أسلوب يعني!! إنك تدي ضهرك وتشتم..لو راجل قول في وشي
وإديته ضهري وقعدت أبرطم : ( بلاوي مليتوا البلد!) و طلعت أجري علي عربية جوزي اللي بقي له حوالي ساعة ونص مستنيني أتاريه هو كمان بيبرطم و عمال يقول : (ربنا عالمفتري )
حدوتة ساخرة بقلم / رانيا كمال العربي
للمزيد..
أسمع كلامك أصدقك 😁 …بقلم/ رانيا كمال العربي
صفحتنا الرسمية فرندة – Farandh
