ازاي تتذوق لمراتك؟ ولهن مثل الذي عليهن | جهاد التابعي تكتب لـ فرندة
النقط الأولي دي لو أنت ظروفك علي قدك نقط أساسية ومفيش عذر بالظروف
1- نضافتك الشخصية أهم حاجة اغسل سنانك كويس عشان شكلها وريحتها و لو مش معاك فلوس تعمل تنضيف بشكل منتظم يبقي تعمل حسابك متزروطش الدنيا سجاير وقهوة كتير.
واللي بيشربوا سجاير كتير حط مع ميزانيه السجاير والقهوج والشيشة ال 300 ج بتوع تنضيف الأسنان مانت بتصرفهم زي الحلاوة في كام علبه فذنبها ايه الغلابه تنام جنب واحد ريحة بقه وحشه او تبصلك تلاقي تراكمات وصفار وجير ؟
2- النضافة الشخصية لو أنت ظروفك علي قدك بشفرة الحلاقة في دقيقه اعمل Trimming لتحت دراعك .. عش العنكبوت دي مش رجوله ملهاش علاقه بالرجولة ودينيا أصلا حلقهم من الفطرة ومكروه شرعا تركه
وإنسانيا وجماليا وكل حاجة والله
3- لو فقير خالص ومش قادر تروح جيم فاعتبر الفقر فرصه تظبط أكلك وتقلله مش تكتره مش العكس، وتستفيد من اللي هترفره تجيب حاجة لنفسك كإنسان ومهما كنت فقير فأكيد تقدر تنزل قبل الشغل بربع ولا نص ساعه تتمشي او اخر اليوم او تجري حوالين البيت ده انت راجل وعندك الفرصه دي الستات سواء فقيره او غنيه متعرفش تتمرن غير في چيم بسبب التحرش فعالأقل انت عندك نعمة إنك تجري في الشارع متتحججش ان مفيش فلوس للچيم .. مش مطلوب منك تبقي فورمه بس عالأقل تبقي Fit ومن غير كرش ده أبسط حقوق البني آدمه اللي معاك عشان تقدر تحس حاجة ناحيتك
احنا زيكوا برده بنتفرج عالتلفزيون وبنقارن من جوانا غصب عننا فحرام بني ادمه تاكل أكل وحش كل يوم ومش عارفه تعبر عشان متجرحكش حس بيها
للمزيد ..
حد شاف جوزي؟ جروب نسائي لفضايح الرجالة والتأهيل النفسي يعلق (معقدات)
4- مش لازم تحط بيرفيوم غالي بس مزيل العرق أهم من نور عينيك
5- لو مش معاك ميزانيه للهدوم مش مهم ولو مش بتعرف تلبس وتختار الوان تقدر تبقي شيك
برده انت مش محتاج اكتر من قميصين أو تلاته بألوان سادة أبيض واسود وكحلي أو رمادي
اللبس Basic بيخلي أي راجل شكله نضيف وابن ناس وطالما جسمك مفرود ومفيش كرش
هتبقي نجم في نفسك حتي لو اللبس رخيص
حلو؟ طيب يا ستي أنا راجل مقتدر وربنا مديني من وسع وبعمل كل الأساسيات دي وحابب
اتذوق لمراتي أكتر .. أعمل ايه كمان؟
اعمل هوليود سمايل أو تبييض وظبط سنانك أكتر الرجالة مش بتحط ميكب زي الستات
فأسنانهم حاجة مهمه جدا في ابتسامتهم مفيش روچ يعمل تمويه او مؤثرات والوان زينا
ظبط جسمك أكتر بقي روح چيم واعمل فورمه وروح لدكتور تغذيه استشيره في المكملات
والفيتامينات اللي تناسبك
اعمل ليزر لإزالة الشعر الدائم من الأماكن الأساسية
وخد رأيها لو مضايقه من شعر ضهرك مثلا أو شعر الشيست مش كل البنات بتحب ستايل تامر حسني وملهاش علاقه بالرجولة دي نضافة وأذواق
البس بقي ودلع نفسك وتابع الموضه
وخليك رقيق وبرنس كده واسألها هتلبس لون ايه وانتوا نازلين وطقم معاها بنحب التفاصيل دي والله❤️
لو شعرك وقع او اصلعيت او دقنك مبتطلعش وعندك الإمكانية ازرع شعر
عمليات التجميل مش عيب خالص لا للرجالة ولا للستات وبقي في بالفعل رجالة كتير بتعمل
عمليات تجميل لكن مش بيقولوا .. ومن أكتر العمليات اللي بتفرق جذريا في شكل الراجل زراعة
الشعر وتعديل الأنف والتكساس للفك وتدبيس المعدة أو الشفط
خد تان لو هي بتحبه.. أغلبنا بنحب الراجل اللي واخد تان
متغيرش من الممثل او المغني اللي بتقول عليه وسيم .. اعمل زيه لو تقدر خليك مرن مش عيب فيها ايه لما تتذوق لمراتك وتملي عينيها ؟
اه أنت لازم تتذوق لمراتك وده حقها عشان تعفها وعشان الدين اداها الحق ده بس العادات خلتها أضعف من إن هي تطالب بيه واتهامها إنها تافهه لو طلبته.. بس بالعقل كده ماهو ده حقك أنت كمان وهي بني آدم زيك وأنت بتبقي عايزها متكدبش عليك وعايزها مش طوبه طب ازاي؟ ماهو لازم تبصلك تلاقي ما يسرها ❤️❤️
وحبوا نفسكوا وخليكوا فرفوشين
للمزيد ..
صرصار في المطبخ.. إشكالية القوة بقلم جهاد التابعى
صفحتنا الرسمية فرندة – Farandh
