طلب صداقة من عروسة البحر!!
بتجيلي طلبات صداقة عالفيس بوك من أسماء مايعلم بيها الا ربنا!!
مرة فتحت لقيت طلب من المرحومة فاتن حمامة.
، ومرة من عبد الوهاب ،ومرة من الزعيم مصطفي كامل ،ومرة من الست ام كلثوم شخصيا
،وطبعا مصدقتش نفسي وبعتلها عالخاص : ربنا يرحمك يافنانة
وردت عليا بمنتهي الذوق: تعيشي يا عسل
،وبيجيلي كمان اسماء غريبة في طلبات الصداقة يعني امبارح لقيت طلب صداقة من “سترك يارب”
وطلب صداقة من ” عروسة البحر”
بقي معقولة عروسة البحر هتسيب مشغولياتها والبلاوي اللي وراها في البحر و تبعتلي طلب صداقة!!
و لقيت طلب تاني من “عفريت العلبة ” وطلب من “مابقتش فارقة” !! ولما هيا مش فارقة بتبعتلى طلب ليه يا “مابقتش” ياخويا ؟؟
وطلب من “خضار فريش ” واكلات مفرحة” واللي راعبني بقي طلب صداقة من ” التنين الاسود”
معرفش بيجيبوا الاسماء المريبة دي منين !! طاب ماتكتبوا اسمكم عادي كده زي الناس ولا هو لازم شوية غموض عشان ترعبونا يعني!!
ولقيت “فخورة باخلاقي” داخلة تكلمني
فقلت لها: ازيك يا فخورة عاملة ايه؟
قالتلي: انتي عارفاني؟؟ انا رشا اللي كنت جمبك في الديسك في الحضانة ياتري فاكراني !!
انا: الكدب خيبة ده انا مش فاكرة كلت إيه امبارح !! سامحيني إنتي وقعتي من الذاكرة يا فخورة يا أختي معلش !!
والمشكلة اني بلاقيها كل شهرين تغير اسمها يعني مرة فخورة باخلاقي ومرة ملكة احساسي ومرة سفيرة احلامي ومرة ضحكة انغامي !!
بس كله كوم وطلب الصداقة اللي جالي امبارح ده كوم تاني !!
طلب صداقة من “مها مجدي “
مها مجدي؟؟ ايه الاسم الغريب ده؟؟
رانيا كمال العربى
للمزيد..
بيت القبطية لـ أشرف العشماوي | حَاكموا هدى لأنها أرادت الحياة pdf
صفحتنا الرسمية فرندة – Farandh