حكاية صلاح منصور والشيخ مصطفي إسماعيل واللف على الجنايز!
من الحكايات الفنية الجميلة التي تروي عن الفنان الكبير عمدة السينما المصرية العظيم صلاح منصور ، انه كان متيم بسماع صوت الشيخ مصطفى إسماعيل لدرجة ان الناس كانت بتعتبر صلاح منصور مجذوب من مجاذيب الشيخ مصطفى إسماعيل
بيقول الكاتب الكبير محمود السعدني في كتابه
” الطريق إلى زمش ” أن صلاح منصور كان بيمشي ورا الشيخ مصطفى إسماعيل في المحافظات عشان يحضر المآتم و يسمع صوته و هو بيقرأ قرآن
بيحكي السعدني أن صلاح منصور من شدة إعجابه و هيامه بصوت الشيخ مصطفى إسماعيل كان أحياناً بيردد ألفاظ ميصحش تتقال أثناء قراءة الشيخ للقرآن زي مثلاً أن صلاح منصور كان بيقول مع كل مقطع يتشد فيه مع الشيخ
” قول يا عسل قول .. قول كمان و النبي “
” يا هوووه جت ازاي دي .. أنت عملت كده ازاي”
أنت جننتني “
و بياكد الكلام دا كمان أديب نوبل العالمي نجيب محفوظ
و اللي حكى موقف طريف شخصي حضره مع صلاح منصور ذكره الكاتب ” إبراهيم عبد العزيز ” في كتابه ” ليالي نجيب محفوظ في شبرد “
بيقول انه حضر في مرة تلاوة للشيخ مصطفى إسماعيل و كان حاضر صلاح منصور و كان منسجم بشكل غير عادي مع التلاوة لدرجة انه قام و قال
” ايه يا أخي الحلاوة دي .. يخربيت ابوك “
حكي كمان شكري سرحان أن صلاح منصور هو اللي عرفه على صوت الشيخ مصطفى اسماعيل و انهم كانوا بيلفو وراءه محافظات مصر عشان يسمعوه و في مرة من المرات كانوا حاضرين في ميتم بيتلو فيه الشيخ و صلاح منصور كان مندمج ومصهلل لدرجة انه قعد يقول ” الله عليك يا سيدي .. يا سلام .. اه و النبي حلوة دي كمان شوية”
الأمر اللي تسبب في مشكلة لصلاح منصور وقتها لأن صاحب العزا زعقلو و كان عايزه يمشي و قاله دا عزا اتنين شباب ميتين في حادثة و انت قاعد تقول يا سلام و مصهلل و مجلجل و صاحب العزا أصر فعلا انه يمشي لكن الشيخ مصطفى اسماعيل تدخل ورفض أن صلاح منصور يمشي
و قال لو مشى انا كمان همشي
رحم الله عمدة السينما المصرية العظيم صلاح منصور
و رحم الله احد أعمدة دولة التلاوة الشيخ مصطفى إسماعيل
للمزيد..
الشيخ عبد الباسط عبد الصمد | وشه كان حلو على مبيعات الراديو (صور)