قواعد العشق الأربعون للرجال والنساء لـ دينا أنور
علقت الإعلامية دينا أنور بمناسبة عيد الحب، ووجهت نصائحها بعنوان قواعد العشق الأربعون للرجال والنساء .
وقالت عبر صفحتها الرسمية الرسمية على موقع التواصل الاجتماعي فيس بوك:
قواعد العشق الأربعون .. للرجال والنساء :
أولاً : الرجال :
1- الأمان عند الست أهم من الحب .. أعمل معاها مواقف جدعنة عشان تتطمن لك .. بدال الاسطوانات المشروخة اللي مش هتخليها تحبك ابداً
2- انت الغلطان دايماً .. بلاش تتناقش كتير و تتفلسف .. اعتذر على طول خلينا نخلص و بلاش تنكد على نفسك
3- ما توجعش دماغنا و تقول رأيك .. قول لها اعملي اللي انتِ عاوزاه يا حبيبتي .. عشان كده كده هي هتعمل اللي هي عاوزاه .. خليك ناصح .. إن جاك الغصب خليه بجميلة
4- ما دام ارتبطت .. اتنيل على عينك و ما تبصش على أي ست تانية .. عشان ليلتك هتكون سودا لو لمحتك .. و هتتطربق على دماغ اللي خلفوك لو واجهتك .. و قول على نفسك يا رحمان يا رحيم لو رقّدت لك .. و لو بطلت تغير عليك تبقى خلاص انت و الصالون المدهب سواء 😊
5- فهمها إن الاهتمام بيتطلب عادي مش عيب .. عشان مش كل الستات عارفين إنكم ما بتعرفوش لوحدكم احنا عاوزين منكم ايه 😊
6- اوعى تخليها تدفع حاجة و انت معاها .. هتستنقصك
7- اوعى تاخد منها فلوس و ماترجعهاش .. هتقل في نظرها
8- اوعى توعدها بحاجة و ماتعملهاش .. هتخاف منك لأنك كداب
9- اوعى تعشمها بحاجة و ما تنفذهاش .. مش هتحترم كلامك تاني
10- اوعى تزنق عليها في اللبس .. هتلبس اللي هي عاوزاه من وراك
11- اوعى تمنعها تكلم زمايلها و أصحابها .. هتلفت نظرها ليهم و هي أصلاً سايباهم و مختاراك انت
12- الستات بتحب الفلوس .. خليك بحبوح معاها و اديها فلوس .. فلوس كاش لنفسها .. تعمل بيهم اللي تحبه من غير ما تسألها صرفتهم في ايه
13- الستات بتحب الهدايا .. كل شوية هات لها هدية و حسسها انك بتفتكرها كل ماتشوف حاجة حلوة
14- الستات بتحب المجوهرات .. و أشيك راجل في نظرها هو اللي يهاديها بالمجوهرات
15- لما تجيب لها مجوهرات خليك جنتل مان و اكتب الفاتورة باسمها و حطهالها في علبة الهدية عشان تبقى سند ملكيتها لها
16- لو جبت لها عربية حط لها مفاتيجها في ميدالية شيك و اعملهالها في الهوا كده زي الأفلام عشان المشهد ده حلم كل امرأة و فتاة .. و اكتبها باسمها ماتستعبطش .. بس في اجراءات الترخيص خلي عندك دم و ابعت حد يخلص لها الاجراءات .. او روح انت خلصهالها
17- الستات بتحب السفر .. كل فترة كده احجزوا و سافروا أي مكان .. أي سفرية بتكون شهر عسل جديد بين كل اتنين بيحبوا بعض مهما كانت ضغوط حياتهم
18- الستات بتحب الفسح و السهر .. عشان تلبس و تتمكيج و تحط بارفان و تعمل شعرها و ضوافرها و تتصور بلبس سيكسي .. حكاية ملكة في بيتي و أميرة في بيت جوزي دي أكذوبة كبيرة .. ما تصدقهاش و تبقى عبيط .. عشان ماتروحش تعرف عليك واحد صايع من الفيس بوك يفسّحها و يسهرها و يعيشها اللي نفسها تعيشه برا البيت
19- ما تنتقدهاش أبداً .. تغافل عن عيوبها .. عشان هي كمان أكيد متغافلة عن عيوبك .. و لو ضغطت عليها هتوصلها لمرحلة انتقادك .. و بعد كده هتدخلوا في مرحلة المعايرة .. و دي مرحلة بعدها بيسقط الاحترام .. و مافيش اي علاقة بتستمر بدون احترام
20- ما تقارنهاش بأي ست .. ممكن في الأول تحاول تقلدها عشان ترضيك .. بس بعد كده هتنتقم لكبريائها و هتقارنك بكل الرجالة اللي أحسن منك .. خليها أحسن مش شايفة غيرك .. عشان لو شافت غيرك مش هترجع تشوفك خالص .. حتى لو كنت جوزها و أبو ولادها
21- ساعدها في شغل البيت ما تبقاش بروطة
22- ماتتريقش على سواقتها عشان كل الحوادث انت اللي بتعملها
23- لما تزعلوا من بعض صالحها على طول حتى لو كانت غلطانة .. عشان هي أساساً ما بتغلطش
24- لما تعاتبك بلاش تبقى اخرس و ما تردش .. بلاش تجري و تهرب من المواجهة زي العيال عشان ما تغيظهاش ..قول لها أنا غلطان .. عندك حق ..مش هعمل كده تاني .. صعبة دي ؟
25- اديها مصروف لكوافيرها و ضوافرها و كريماتها و شامبوهاتها عشان تملى عينك و تفضل دايماً حلوة و مزهزهة و مفحفحة
. حتى لو بتشتغل و عندها فلوسها .. الحاجات دي بتتعمل ليك و عشانك
26- اوعى تسافر لوحدك و ما تجيبلهاش معاك أي هدية .. هتفضل فاكرة انك نسيتها عشان كنت مستفرد بنفسك و خاربها مع الستات التانية في غيابها .. هتبقى وقعتك سودا لما ترجع أو لما تحب تسافر تاني
27- اتكلم عليها كويس جداً قدام أهلها
28 – اديها وضعها جداً قدام أهلك
29- احترمها جداً قدام ولادها
30- دلعها جداً قدام زميلاتها و صاحباتها
31- امسك ايديها و انتم ماشيين جنب بعض
32- حط ايدك على وسطها و انتم طالعين من اي مكان
33- حط دراعك حوالين كتفها و انتم قاعدين جنب بعض
34- لما ست غريبة تكلمك و هي معاك بص لها هي عشان الغريبة توجه لها هي الكلام و تفهم انك بتحترم وجودها معاك
35- كل ما تخرج أو ترجع من برا بوسها و أحضنها
36- ما تطبش عليها فجأة .. دايماً عرّفها إنك جاي عشان تستعد .. حتى قبل ما تدخل عليها اوضتها خبّط عالباب و استنى تسمح لك تدخل
37- بعد العلاقة ما تسألهاش اتبسطتي ؟ قول لها أنا انبسطت معاكي قوي .. عرفت ابسطك ؟
38- ما تحكيلهاش كتير عن علاقاتك الجنسية العظيمة .. كل الستات بقت عارفة إن الراجل اللي بيتكلم كتير في المواضيع دي مالوش فيها
39- ما تخليهاش تغير من الستات .. خلي الستات يغيروا من حبك ليها
40- ما تتابعش صفحة عبد الله رشدي عشان كِخ
ثانياً : النساء:
إنتوا صدقتوا و لا إيه ؟ نساء إيه اللي هعمل لهم قواعد للعشق ؟
النساء كلهم زي الفل و زي القمر و زي العسل .. احنا ما بنغلطش و ما بنعملش أي حاجة وحشة
احنا قمرات و نتحب زي ما احنا و بدون شروط و بدون اعتراض .. و اللي عاوزينه لازم يتعمل
ما عدا الستات اللي بتتابع صفحة عبد الله رشدي
كل سنة و كلنا حبايب🌹
#الدكتورة_بنت_الباشمهندس
نجم الأبراج في الارتباط والحب | تقدمها جوليا الزين “من وحي فيلم توأم روحي”
صفحتنا الرسمية فرندة – Farandh
