طلاق ياسمين صبري وأبو هشيمة | دينا أنور: أبو هشيمة نموذج محترم للرجال !!

طلاق ياسمين صبري وأبو هشيمة | دينا أنور: أبو هشيمة نموذج محترم للرجال !!

علقت الإعلامية دينا أنور على طلاق طلاق ياسمين صبري وأبو هشيمة الذي شغل منصات التواصل الاجتماعي مؤخراً.

وقالت عبر صفحتها الرسمية عبر موقع التواصل الاجتماعي فيس بوك:

في مسألة انفصال ياسمين صبري و أبو هشيمة ..

 

طبيعي الرجالة يغيروا من أبو هشيمة و يفلفلوا من جوازاته و يشمتوا في انفصالاته .. لأنه راجل من النوعية اللي مفتقداها الستات اليومين دول .. الراجل الناجح الثري الوسيم المسؤول الشهم اللي بيعرف ازاي يدلّع الست بتاعته و يخليها محط أنظار و غيرة الجميع .. في ناس كتير أغنى منه لكن ما يقدروش يعملوا زيه .. عشان كده غالباً أي راجل هيهاجم أبو هشيمة اعرفي إنه بخيل أو ندل أو نطع أو شحات أو مفلِّس ..

هتلاقي اللي بيهاجمه مثلاً من اللي بيحبوا يستغلوا الستات جنسياً بأقل تكاليف .. و وقت الجد يخلع و يسيبها تتورط لوحدها مع المجتمع الحقير ده .. و لو اهدروا دمها باعتبارها زانية و لا أهلها قتلوها باعتبارها خاطية و لا جيرانها كرشوها من بيتها باعتبارها شمال .. يعمل زي جوز روقة في الفيلم و يقول ما أعرفهاش .. !!

أو هتلاقيه من اللي عاملين تنويريين و علمانيين لزوم استخدام مصطلح تسليع .. عشان بيحبوا يعرفوا ستات بلوشي بدون مهر و لا شبكة و لا بيت و لا مؤخر و لا تكاليف .. و يا حبذا لو كان عندها بيت و بتشتغل و بتصرف على نفسها عشان يتوفر له المكان و ياكل و يشرب و ينام في اوتيل بيقدم له خدمة جنسية و معاها كل الخدمات الأخرى مجاناً .. و يروّح لأم العيال مزاجه رايق و حاسس برجولته من غير ما يغرم تعريفة ..!!

أو هتلاقيه نطع من اللي بيسترزقوا من عرق الستات المضطربة عاطفياً و جنسياً .. و ثلاث ارباع مصاريفه و سجايره و بلالبيعه بيجيبها من بيع جسمه للستات مقابل انهم يصرفوا عليه ..!!

أو هتلاقيه شحّات فاشل مفلِّس .. بيستخدم العواطف و المشاعر و العروض الجنسية و الكلام عن الفحولة كأسلوب عرض لنفسه في سوق النخاسة الحريمي .. على أمل يلاقي ست محرومة و لا رمرامة تبص له و تستخدمه جنسياً مقابل إنها تشغله عندها و يضمن لنفسه دخل و علاقة جنسية بالمرة .. !!

لكن أي راجل بيحترم الستات و يقدّرهم و عارف قيمتهم في حياته كرجل .. لازم يحترم نموذج أبو هشيمة و يشجعه .. حتى لو كان كثير الزيجات و الانفصالات .. عالأقل انسان واضح .. مش زي الغالبية له زوجة واحدة علنية عايشين مع بعض اخوات و عنده عشرين عشيقة و جارية و محظية يفكروه برجولته المدفونة .. و قلبه مساكن شعبية و عواطفه جزمية مفتوحة لأي تاء مربوطة .. زي فؤاد المهندس اللي كان قلبه غاوي أي كعب عالي ..!!!

أبو هشيمة راجل من بتوع زمان .. اللي بيسلكوا سلوك محترم في الارتباط و الزواج و الانفصال .. راجل من اللي بيرتبط بست واحدة بهدف التعارف لغرض الزواج ..

ووقت ما كلام الناس بيكتر بيعلن ارتباطه بكل فخر و بيتشرف بالست اللي مأمناه على قلبها و بيظهر معاها للعلن عشان يخرس أي لسان يتطاول عليها .. و كل الستات اللي بيتجوزهم بيعملهم فرح و بيجيب لهم عربيات و ألماظات و هدايا و بيروقهم فسح و خروجات و سفريات و رحلات باليخوت و الطيارات الخاصة و ما بيقولش لعروسته انت مادية و طمعانة في ثروتي ..

لا و كمان بيسيبهم يشتغلوا و ينجحوا و يكبروا في مجالاتهم و بيساعدهم بعلاقاته على نجاحات أكتر .. و وقت الانفصال بينفصل بهدوء و أدب و بدون شوشرة .. و مافيش ست ارتبط بيها بتشنّع عليه و لا بتسيئ له .. و ده دليل انه بينفصل بشكل حضاري و بيديهم حقوقهم و بيحافظ على الود معاهم ..

ماتخلوش حد يضحك عليكم باسم الحرية و يكلمكم عن المساكنة و النموذج الأروربي في العلاقات الجنسية المفتوحة و الطياري باعتبارها الضمان السليم لمشاعر الرجل ..العلاقات الأوروبية لها قوانين صارمة تحميها .. الرجل هناك ممكن يدفع تعويض يخرب بيته لو عنّف صديقته أو أخل باتفاقاته معاها أو تراجع عن وعوده لها .. و في حالة الزواج بيقتسموا كل حاجة بالنص .. و في حالة الانفصال بيقتسموا ثرواتهم المشتركة بالنص .. و الست اللي اشتغلت ربة منزل بتاخد نظير كفاحها باعتباره عمل منزلي ساعد زوجها في تنمية ثروته .. و ماتصدقوش الجرابيع اللي بيقولوا لكم الأجنبية مش بتطلب مهر و لا شبكة و لا قايمة .. الأجنبية بيجيلها خاتم ألماظ فص منه قد كل جهازك و فرحك و شبكتك .. و بيتعمل لها بيت جميل لها النص فيه بالقانون من الابرة للصاروخ .. مش زينا بيتسرق فرشها و بيتها عياناً بياناً و يادوب بيعتبروها خيانة أمانة مش سرقة حقوق ..!!!

الرجل بطبعه مُقل جداً في المغازلات و المعاملات الرومانسية .. و غالبية مشاعره – إن كانت حقيقية- بيترجمها لأفعال و سلوكيات تشعرك بالأمان و الحماية و الدعم و الغيرة عليكي ..

أي راجل عاوز يخطف و يجري هو حيوان قولاً واحداً و بيلعب بيكي و مش عاوز يلتزم تجاهك .. الرجال الأسوياء و إن لم يكونوا بارعين في الرومانسية كغيرهم من المرتزقة .. إلا أنهم بيكونوا بارعين في إشعار الأنثى بالأمان و الضمان .. و هي القيم الأعلى لكل إناث الأرض و التي تعلو حتى على الحب .. و رغم ذلك عندما يحاولون ممارسة الرومانسية العزيزة لديهم لكثرة أشغالهم و انشغالاتهم تكون رومانسيتهم الشحيحة صادقة و عميقة ..

خذيها قاعدة ذهبية في حياتك ..

كل من يحدثك عن التسليع و عدم أهمية المال و البيت و السيارة و يوهمك بأنك مادية و طماعة و مستغلة عندما تتطلعين للرفاهيات هو مجرد بخيل أو نطع أو مفلس أو فاشل يريد استغلالك جنسياً بلا تكاليف ..

دينا أنور

للمزيد..

دينا أنور عن الجنس والجواز: وسائل تخدير للفقراء واسألوا ياسمين صبري! (صور)

و كل من يحدثك أن الاحتواء و الأحضان و القبلات و الجنس أهم من الضمانات المادية لحياة كريمة هو عاهر يبحث عن جنس دائم على نفقة امرأة أو عائلتها أو الاثنين معاً ..

الأحضان و القبلات و الجنس في سرير رجل مفلس أو نطع أو بخيل مش هتحميكي من التحرش في المواصلات و المضايقات الجنسية من أرباب العمل و القيل و القال إن كانت علاقة بدون زواج رسمي .. مش هتحميكي مغازلاته الكاذبة من الذل و الحاجة و السؤال و الشقاء .. و على رأي جدودنا العظماء .. الفقر لو دخل من الباب الحب يخرج من الشباك ..

لكن اللي يوفر لك البيت و السيارة و المصروف و الحياة المرفهة بقدر سعته .. سيحميكي من كل ما سبق .. و لن تضطري للقبول بعمل لا يعجبك .. و لن تتحملي أي مضايقات في سبيل الحاجة .. و ربما تدفعه غيرته عليكِ لإقامة مشروعك الخاص أو لإدارة أحد أعماله حتى يقيكِ مضايقات الرجال ..أو على الأقل هيسيبك تنجحي في مجالك و انت مطمئنة إلى عدم اضطرارك أو حاجتك ..أو عالأقل هتلاقيه بيساعدك و يحميكي و فرحان بنجاحك و مش بيحاول يحطمك أو يقلل منك ..!!

ادعموا نموذج أبو هشيمة و ماتعوموش على عوم الرجالة .. بطلوا خيابة و هبالة ..!!

اللي شمتانة قوي في ياسمين و بتقول لها وقتك خلص و طلقك و رماكي .. جالك زيها يا موكوسة عربية بعشرة مليون جنيه ؟

جالك زيها خاتم سوليتير معمول عمولة بآلاف الدولارات ؟

جالك زيها فساتين براندات و مجوهرات و ساعات من أغلى الماركات ؟

ركبتي زيها يخوت و طيارات خاصة ؟

سافرتي زيها كل بلاد العالم واتعاملتي ك vip … يبقى تتوكسي .. تعرفي تتوكسي ؟

يا اللي بيعتي دهبك و اديتيه للشملول يشتري بيت باسمه .. و يا اللي كسرتي وديعة ورثك عشان تديه لنطع يعمل بيه مشروع وهمي .. و يا اللي صرفتي على بغل و علفتيه عشان يعمل معاكي علاقة عشر دقايق .. و يا اللي بتصرفي عالبيت و الاسم انك في عصمة راجل .. سايبة كل خيبات حياتك و شمتانة في ياسمين ؟!

عالأقل ياسمين وقعت واقفة و اتجوزت رسمي وعاشت في العز سنتين .. و استفادت من علاقاته و فلوسه و عملت بيزنس لنفسها .. و كمان بعد ما قرروا الانفصال مسحت صوره و لغت متابعته .. ما قعدتش تستعطفه و لا موتت نفسها وراه .. ست واعية بتحب نفسها أكتر من أي حد .. و شعارها في الحياة من حبنا حبيناه و صار متاعنا متاعه .. و من فارقنا فارقناه و يحرم علينا اجتماعه .. برافو عليها و ياريتكم تتعلموا منها ..

و أخيراً .. مش كل العلاقات المستمرة ناجحة .. و مش كل الناس اللي عاشت مع بعضها طول العمر عاشوا علاقات صحية .. كلنا عارفين إن 99٪؜ من الأزواج منفصلين سريرياً و عاطفياً و نفسياً و جسدياً .. و كلنا عارفين إن الخيانات الزوجية في صفوف النساء و الرجال بلغت أعلى معدلاتها بسبب الخرس الزوجي و الانفصال الغير معلن .. و كلنا عارفين إن أكبر أكذوبة عاشوها المتزوجين هي أكذوبة عشان البيت و العيال .. و النتيجة رجال عندهم احتقان جنسي .. و نساء عندها برود عاطفي ..

عشان كده تلاقوا المتزوجين و المتزوجات شديدي الحقد على المنفصلين و القادرين على اتخاذ قرار الانفصال الرسمي .. و بيحاولوا دايماً يستغلوهم أو يوصموهم أو يسقطوا عليهم اتهامات مادية أو أخلاقية .. لأنهم عاجزين يكونوا في قوتهم و احترامهم لنفسهم .. و عشان كده بيفاجئ كثير من الرجال بصعوبة منال السيدة المنفصلة مقارنةً بسهولة كثير من الزوجات الخائنات .. المنفصلة لو كان لديها الاستعداد لاسترخاص جسدها لبقيت متزوجة و فعلت ماتريد سراً كما يفعل الغالبية .

كل الاحترام لكل من يتزوجون رسمياً و ينفصلون علنياً .. لكل من يدركون أن الحياة لا تتوقف عند شخص .. و المشاعر تموت و تنتهي و تولد من جديد طالما بداخلنا قلب يدق .. من يعلمون أن حياةً خالية من الشغف و الشوق و الرغبة حياة لا معنى لها تستنزف الروح و تجلب الأمراض .. و ما أحلاها عيشة الحرية .. و أهلاً بالحب فقط عندما يأتي بلا تنازلات .

الدكتورة بنت الباشمهندس

للمزيد..

8 أسباب وراء طلاق ياسمين صبري من وجهة نظر علم الطاقة

صفحتنا الرسمية فرندة – Farandh