الملوخيه.. الشهقة مصري والطشة ملوكي !!

الملوخيه الشهقة مصري والطشة ملوكي بقلم سماح رمضان

لكل أكله حكاية وورا كل حكاية اسرار.. والنهاردة هنعرف إزاي كانت بداية الملوخية والسر في شهقتها..
الملوخية طبق اساسي على السفرة المصرية .. بيعشقها المصريين.. ومفيش بيت مصري مش بيحبها.. أو مش موجودة فيه
الملوخية في مصر ليها طقوس خاصة.. اهمها طشة التقلية والشهقة اللي مش بتتاكل الملوخية من غيرها.. على حسب رواية الست المصريات.

في روايات كتيرة بتتقال عن نشأة الملوخية ومعرفة الناس بيها.. وعلى الرغم من ان اليابان نسبت الملوخية اليها من فترة قريبة، إلا ان الملوخية مصرية ثقافيا وشعبياً.
الناس كانوا بيعتقدو ان الملوخية زرع سام ولما احتل الهكسوس مصر اجبروا المصريين على أكلها كنوع من التعذيب، ولكن المفاجأة بقي انهم لما كلوها حبوا طعمها، وعلقت معاهم لحد ما بقت من الأكلات الشعبية الرسمية المصرية.
وفي رواية تانية، بتأكد ان العرب كانوا بيعرفوا الملوخية من الأول.. وبيقولوا أن المعز لدين الله الفاطمي لما جاله شوية مغص جامدين في معدته.. أمره الطبيب الخاص بتاعه أن ياكل ملوخية.. والجميل بقي أنه المغص خف تماماً .. قام المعز وقع في حب الملوخية ودايما كانت متربعة على سفرته..
الملوخية كان اسمها الأول ملوكية، ودا لأنها كانت الأكلة المفضلة للملوك ودا بحسب كتب التاريخ مش كلامنا يعني.. والملوك أمروا عامة الشعب بعدم أكلها، وبعد كدا اتحرف اسمها لـ ملوخية.
بيقولك.. أن أول شهقة للملوخية كانت من الحاكم بأمر الله الفاطمي اللي اتدلقت الملوخية على رجله وهيا سخنة فاتشائم منها وبطل ياكلها وسمح للشعب أنه ياكلها.. وبدأت الستات تشهق وهيا بتعملها فرحة بالشهقة اللي سمحتلهم انهم ياكلوها..
وفي رواية مختلفة بتقول أنه زمان المطبخ المصري مكنش فيه بوتاجاز.. وكانت الست المصرية بتقعد أدام الحطب المولع علشان تطبخ.. ولما كانت بتوصل لطشة الملوخية كانت بتشهق بصوت عالي علشان تبعد الطيور اللي بتربيها في البيت علشان الملوخية السخنة متتكبش عليهم.
روايات كتير على الشهقة والطشة.. لو فضلنا نحكي مش هنخلص المهم أن الملوخية بتحتاج شطارة بتختلف من ست للتانية، علشان تبقي مميزة.. ولما الملوخية بتبقي وحشة أو مش مظبوطة بتلاقي الست تقول إنها اتنظرت وصابتها عين الحسود.. ال حسود ال دي بتداري خيبتها في الطبيخ.

           بقلم سماح رمضان

صفحتنا الرسمية فرندة – Farandh

ٌٌ Related posts:

 healing before getting in twin flame Signs of twin flame union protection حكاية القط الأسود والإسقاط النجمي | قصة رعب قصيرة Life is possible only through challenges عقود الأرواح | توأم الشعلة أم توأم الروح أم شريك الحياة؟! starseed why do bad things happen to you THE HOLY UNION | When the Masculinity meets the awakened Femininity Developing the Physical Body تاريخ الأرجيلة | ملامح القاهرة في ألف عام