5 أحلام مرتبطة بالصحوة

 

🔹الاحلام دي بتكررر كذا مرة بعد الصحوة الروحية.. الروح بتساعدك تتعرف علي مخاوفك ونقاط ضعفك.. بدلك علي الطريق.. علشان تشتغل علي نفسك.. وتحرر روحك.. دي الاحلام اللي مريت بيها في رحلتي للتشافي.. وفسرتها وربطتها بعلاقة توأم الشعلة.. اي شخص ممكن يحلم بيها.. مش شرط توائم الشعلة.

♦️حلم الهروب
بتحلم انك خايف.. و في حد بيجري وراك.. ممكن شخص مجهول او كلب او قطة او حاجة بتخاف منها… الخ
👈التفسير… هو انك بتهرب من نفسك وماضيك وخايف تواجههم.. والمفروض تشتغل علي النقطة دي.. في انك تسامح الشخص اللي ظلمك في الماضي.. الشخص اللي ظلمك.. مش كان قاصد يظلمك.. لو ركزت في حياته.. هتلاقيه زيك كان ضحية ظروف مر بيها في طفولته.. حرر نفسك وروحك بالمسامحة.. علشان تقدر تعيش الحاضر.. وتخطط للمستقبل.

♦️الصراع
بتحلم انك بتتخانق مع حد تعرفه او بتكرهه او شخص مجهول الهوية.. الخ
👈التفسير الصراع هو صراع بينك وبين نفسك.. وحان وقت المواجهه.. وانك تدخل داخل اعماقك وتفهم نفسك وتحاول تغيرها.. علشان تقدر تتواصل مع الحياة وتحقق احلامك وانجازاتك.

♦️حلم المتاهه
بتحلم انك في بيت وتايه ومش عارف تخرج منه.. او ماشي في شوارع زي المتاهه ومش عارف توصل.
👈التفسير
المتاهة في الحلم هي علاقة توأم الشعلة..احنا كلنا محبسوين في العلاقة.. وبقالنا سنين ومش عارفين نخرج منها.. لا عارفين نتجوز توأمنا ولا عارفين ننفصل عنه ونعيش حياتنا.. وده معناه ان كل شئ في ايدين ربنا.. واننا مهما حاولنا نخرج من المتاهه مش هنعرف.. الا بإرادة ربنا.. والمطلوب مننا التسليم الكلي.. والقرب من الله والدعاء.

♦️حلم العودة الي المنزل القديم او طفولتك
بتحلم انك في بيتك القديم اللي اتولدت فيه قبل ما تنتقل بيتك الحالي.. او رجعت لمرحلة الطفولة
👈التفسير
المنزل القديم طفولتك.. اي طفلك الداخلي المحبوس جواك.. عايز يخرج ويتحرر.. فبيظهر في احلامك علي هيئة ذكرياتك طفولتك اللي عشتها في بيتك القديم.. والمطلوب منك تحرر طفلك الداخلي.

♦️حلم العودة الي المدرسة
بتحلم انك رجعت المدرسة او بتذاكر ومش فاهم او بتمتحن ومش عارف تحل او قاعد في الفصل مع اصحابك او في الكلية او اتأخرت علي الامتحان.. الخ
👈التفسير
ان في درس في الحياة ناقصك.. ومحتاج تتعلمه.. والمطلوب منك تراجع نفسك.. وتشوف ايه النقطة اللي انت مش اشتغلت علي نفسك فيها.. والمطلوب منك تشتغل عليها.

🔹بعد التشافي الاحلام دي هتختفي.. وده معناه انك اتعلمت دروسك وتشافيت من آلامك وحان وقت النجاح والاستقرار والسعادة.

شارك المقالة