علقت الفنانة رشا مهدي على حالة الجدل التي أثارتها الفنانة معتزة صلاح عبد الصبور مؤخرًا، بعد هجومها على الفنان عبد الرحمن أبو زهرة.
وقالت “مهدي” في منشور على حسابها الشخصي على “الفيس بوك”، “بمناسبة الكلام عن علاقة عمنا الاستاذ عبدالرحمن أبو زهرة بالممثلات و النجمات في اللوكيشن و ان محدش “سلم من لسانه”..انا اشتغلت مع الاستاذ كذا عمل آخرهم مسلسل أستاذ و رئيس قسم مع الزعيم و مشفتش من استاذ عبدالرحمن غير كل خير طبعا، بس آخر عمل ده بصراحة “مسلمتش من لسانه” و هحكي ايه اللي حصل”.
وتابعت، “اول يوم تصوير شفته وكنا من سنين متقابلناش فسلمت عليه و قام ربنا يديله الصحة و سلم عليا بس كان بسرعه أوي ورجع قعد تاني!
بصراحه اتفاجئت و خفت يكون زعلان مني فبعد ما سلمت عالناس رجعتله و قعدت جمبه و فضل ساكت فقلقت اكتر وقلتله حضرتك فاكرني؟ فمن غير ما يبصلي قالي آه فاكرك!”.
واضافت، “بصراحة استغربت اكتر من طريقة المعامله و فضل ساكت فقلتله طب فاكر اشتغلنا ايه مع بعض؟ قالي آه و سكت برضو!.
بصراحة الموضوع استفزني اكتر فقلتله طب انا اسمي ايه؟ وهنا انفجر فيا وقالي بصوت عالي “رشا مهدي فاكرك يابنتي والله فاكرك واشتغلنا كذا و كذا و كذا ولو انتي بقى فاكره كنت بقول سيبوني اركز قبل التصوير عشان اعرف اشتغل وانتي كمان قومي زاكري و نبقى نتساير بعد الشغل يا بنتي”.
عبد الرحمن أبو زهرة بين «المنع السياسي» وجحود السوشيال ميديا
واستكملت، “انا طبعا مقدرتش امسك نفسي و ضحكت وهوا بيزعق و اللوكيشن كله ضحك وهوا حبيبي ممسكش نفسه و ضحك و طبطب عليا وقالي يابنتي كنت مركز متزعليش مني و قعد يسأل على ماما و اخواتي و عليا ويقولي رأيه في شغلي و بعدها قمنا نحضر، وفجأه الزعيم راح للأستاذ عبدالرحمن وهوا مركز تاني وقرب منه وقاله بصوت عالي “انت فاكرني؟”.
واختتمت كلامها قائلة، “طبعا مش محتاجه اكمل افيه انت فاكرني ده كان عامل ايه في اللوكيشن طول التصوير، عمنا عبدالرحمن حضرتك نجم و فنان و أب من الزمن الجميل ربنا يديك الصحة طول عمرك قامة و قيمة ومبتبخلش على حد بخبرتك و فنك، انت فاكرني طيب؟”.