دينا أنور: أي راجل بيدخل بحياتك بيكون هدفه الجنس
تدوينة جديدة للاعلامية دينا أنور الملقبة الدكتورة بنت الباشمهندس أثارت الجدل.
![دينا أنور: أي راجل بيدخل بحياتك بيكون هدفه الجنس](https://farandh.com/wp-content/uploads/2020/08/BeautyPlus_٢٠٢٠٠٨١٦١٦٣٣٢٧١٧٧_org-e1598703640326.jpg)
وقالت:
الرجالة الأنطاع ياعيني من امبارح ما ناموش بسبب منشوري الأخير .. خايفين تمشوا ورايا و تسمعوا كلامي و مايلاقوش واحدة جديدة يستغلوها جنسياً .. و شغالين تنظير و بلا بلا بلا..
زي ما رجال الدين ضحكوا عليكم بأوهام التكريم و القوامة عشان تفضلوا سلع جنسية يتمتع بيها الراجل و يعدد منها و يطلق و يرمي و يسبي و كله بالشرع .. اليساريين كمان بيضحكوا عليكم بأوهام المساواة و الشراكة و الاستقلالية عشان تفضلوا سلع جنسية يصاحبوا منها و يرافقوا و يبتزوا و كله بالشعارات ..
خايفين تتوعوا و ماتعبروش أي صرصار منهم .. و يلاقوا نفسهم مضطرين يشوفوا صوركم و يتمنوكم من غير ما يعرفوا يوصلوا لكم ولا تستعنوهم ..
بصي يا حبيبتي منك ليها .. كل راجل بيدخل حياتك هدفه الجنس .. من أول شيخ الجامع لحد صاحب الكباريه لحد زعيم الحزب .. و كل واحد منهم بيشوف مدخلك إيه عشان يوصل للهدف ده بأقل تكاليف و أقل خساير ..
دورك بقى إنك تعملي لنفسك و جسمك قيمة .. و تفهِّمي كل اللي يقرب منك إنك عالية و غالية و ليكي معاملة خاصة .. قوية و مستقلة آه بس لنفسي مش ليك .. ساندة نفسي آه بس مش هدخلك حياتي غير لو علِّيت عليا و سندتني أكتر و حميتني أكتر لأني مهما كنت قوية المجتمع بيضعفني ..
عاوز تدخل حياتي يبقى تدلعني و تهنني و تشيلني على كفوف الراحة و تتمنى لي الرضا أرضى .. و كمان تبقى مسؤول عني و تاخد بالك مني و تحل لي مشاكلي أو تساعدني أحلها أو عالأقل ألاقيك جنبي و أنا بحاول أحلها .. عشان يادوب أشوفك راجل و أبدأ أفكر فيك كراجل ..
للمزيد..
في اليوم العالمي للفتاة | ياسمين الخطيب: العنوسة شبح وهمي
إنما شغل اخطف و اجري ده .. و النهاردة في حضنك و بكرة يتنكر لك و مايعرفكيش و يطنشك و يهملك و يتأخر في الرد عليكي عشان طالك .. و كمان ممكن تلاقيه بيكلم غيرك و مهتم يرد على أوكشة ماتسواش و راكنك إنتِ عشان ضامنك .. فده شغل استرخاص و استهانة .. قابلاه على نفسك اشربي يا حلوة .. ماحدش هيدور على كرامتك و كبريائك و إنتِ بنفسك بتبعزقيهم ..
مافيش حاجة اسمها مساواة طول ما إنتِ بتورثي النص و شهادتك النص و هو ليه حق الطلاق الشفوي و التعدد و إنتِ لو حبيتي تخلصي لازم تدفعي و تتنازلي عن حقوقك و تقعدي سنتين لحد ما تخلعيه ..
مافيش حاجة اسمها مساواة طول ما المجتمع شايف إن أبوكي و أخوكي و جوزك من حقهم يأدبوكي بالضرب ..
مافيش حاجة اسمها مساواة طول ما أسهل حاجة تتشتمي بشرفك و تتطعني في أخلاقك و يغتالوكي معنوياً عشان لبستي براحتك و لا رقصتي و لا صاحبتي ..
مافيش حاجة اسمها مساواة طول ما إنتِ مضطرة تمشي أمورك و تتغاضي عن التحرش و الابتزاز الجنسي عشان خايفة من الفضايح أو قلقانة على سمعتك أو مش حمل قطع أكل عيشك أو محتاجة شغل أو ليكي مصلحة ..
![دينا أنور: أي راجل بيدخل بحياتك بيكون هدفه الجنس](https://farandh.com/wp-content/uploads/2020/08/BeautyPlus_٢٠٢٠٠٨٠٧١٠١٢٣٣٦٨٣_org.jpg)
مافيش حاجة اسمها مساواة طول ما إنتِ اللي بتحملي و تولدي و تتوصمي لو العلاقة بدون زواج رسمي .. و ممنوعة من الإجهاض بالقانون .. و هتبقي مطالبة باثبات النسب و احتمال التعهير و التحقير ..
احنا مش محتاجين مساواة لأننا الجنس الأنقى و الأرقى .. احنا محتاجين نسترد حقوقنا المغتصبة .. محتاجين نثور و نعترض على شرائع و قوانين ذكورية بتفقرنا و تحوجنا و تخلينا طول عمرنا تحت رحمة غيرنا ..
محتاجين نلاقي الأمان في مجتمعات بتتفنن إنها تخوفنا و تهددنا و تخلينا نايمين مفتحين عين و مغمضين عين ..
حب إيه و جنس إيه اللي هتدوهم الأولوية في الوضع المهين ده ؟ استقلالية ايه و مساواة ايه اللي هتحمليها على اكتافك و انتِ لسه ماشية تعرجي من السلاسل اللي مربوطة في رجلك من يوم ما اتولدتي ؟
اسمعوا كلامي و استغنوا … جمدوا قلبكم و خدوا وضعية نجوم السما .. جميلة و مستحيلة و بعيدة و الوصول ليها مكلف و متعب ..
كل حاجة مهمة ليها قيمة .. و أي حاجة سهلة و متاحة بتهون و ترخص و قيمتها بتنهار .. و نفس الرجالة اللي بيفضلوا يكلموكم عن الشعارات الحقيرة دي هما أول ناس بيدفعوا دم قلبهم و ياخدوا قروض و يستلفوا لما تستعصى عليهم واحدة عاجباهم و يقرروا يوصلوا لها مهما كلف الأمر ..
خليكي الصعبة اللي يتمرمط عشان يوصل لها .. أحسن ما تبقي المشاية اللي بيدوس عليها رايح جاي عشان دايماً مفروشة تحت رجليه ..
للمزيد
بصور مثيرة| عودة دينا أنور لـ الفيس بوك بعد يومين من غلق حسابها (صور)
رجال الشرق الأوسط كلهم بلا استثناء عندهم رواسب ذكورية أفسدت وجدانهم .. عشان يتعمل لهم تصحيح مفاهيم لازم يلاقونا احنا اللي مصممين على التغيير .. لأن كل اللي بيحصل من الأديان و القوانين و العادات و التقاليد في مصلحتهم و على هواهم و في صالحهم و بيخدم أهوائهم .. و مافيش راجل بيرفضه إلا لما ضميره بيصحى و انسانيته تنقح عليه .. أو لما يحس بظلم و وجع واحدة منه أو تهمه ..
أنا نسوية آه بس لابتاعت تنظير و لا مزايدة و لا شعارات .. بتكلم من واقع خبرتي و مشاهداتي و الحكايات اللي بشوفها و بسمعها .. عارفة إنك مهما كنتِ قوية فكل حاجة حواليكي بتضعفك .. عارفة إن قوتك نفسها مكروهة من الرجالة عشان ضعفك و خنوعك هما اللي بيمكنوهم من استغلالك ..
عارفة إن غريزة الصيد متأصلة في الرجل على مر الزمان و طول ما أنتِ بتهربي منه هيدور عليكي و أول ما تعيشي دور الفريسة هيشبع منك و يسيبك مرمية ..
دي حقايق مؤكدة .. و الغريب إن الرجال نفسهم بيأكدوها .. بس كل واحد فيهم مصمم إن التعميم ظلم و إن لكل قاعدة شواذ .. و طبعاً شايف إن هو الاستثناء ده .. رغم إن اللي يأكد ده أو ينفيه الست اللي في حياته مش هو ..
للمزيد..
نهى العمروسي ترد على تورط ابنتها نازلي كريم في فضيحة اغتصاب فندق فيرمونت
لحد بقى مايثبت لك إنه فعلاً استثناء .. خدي خطوة لورا و استغني .. شوفي هيبذل مجهود عشانك و لا مستخسره فيكي .. و خليكي متأكدة إن في ست واحدة في حياته عالأقل عذبته و ورته النجوم في عز الضهر و كان على قلبه زي العسل .. اشمعنى انتِ اللي هتعملي له قلبك مداس ؟ عشان الحب ؟ عشان الجنس؟
في ستين داهية .. حتى اللي ماعندهومش أي مشاكل .. تفتكري قاعدين يحبوا في بعض طول الليل و النهار و مابيقوموش من السرير ؟ هو حد طايل في العصر ده ينام له ساعتين عشان تبقى كل حياته متوقفة على ممارسة الجنس ؟
اسمعوا مني الخلاصة عشان قلبي وجعني من المناهدة .. المهم الاحساس بالأمان في الحب مش وجود الحب في حد ذاته .. طول ما انت خايفة يبقى فيه حاجة غلط ..
و الأهم السعادة الجنسية مش الممارسة الجنسية .. لأن كل المتجوزين عندهم فرصة يومية مجانية لممارسة الجنس و رغم كده ٩٩٪ منهم عايشين اخوات ..
أنا قولت اللي عندي و اللي بربي عليه بنتي .. و اللي بياكل على ضرسه ينفع نفسه .. و زي ما فوقنا من التحكمات الدينية و المجتمعية و خليناهم يبلوها و يشربوا ميتها .. لازم كمان نفوق من الشعارات اليسارية و التنظيرات النسوية اللي بتزود علينا أعباء و بتعرضنا للاستغلال و الابتزاز .. و طبعاً بعد ماتفوقوا منها عارفين هتلفوها و تحطوهالهم فين .
#الدكتورة_بنت_الباشمهندس
للمزيد..
دينا أنور : الرجولة مش ممارسة الجنس والانتصاب !!
صفحتنا الرسمية فرندة – Farandh
![دينا أنور](https://farandh.com/wp-content/uploads/2020/09/BeautyPlus_٢٠٢٠١٠١٢١١٣٤٥٩٨٣٥_org.jpg.webp)