أسمع كلامك أصدقك 😁 …بقلم/ رانيا كمال العربي
كان فيه واحد زميلنا فى الكلية وكان لما يسمعنا نتكلم عن الأبراج يتعصب ويدينا محاضرة فى الاخلاق ..كده حرام..ابراج ايه؟ ايه الجهل ده..وبعد شوية يجى يسالنا: عايز اعرف بس ايه اخبار الحمل مع الجوزاء؟؟يعنى بيتوافقوا ولا لاء؟؟
اعرف واحدة مابتحبش تطبخ ملوخية يوم الجمعة..وكانت قاعدة عند واحدة ونسيت وطبخت ملوخية يوم الجمعة..ولما افتكرت زعلت اوى وخافت..جوزها قالها: ايه المشكلة يعنى.؟؟ قالت له:اصل انا بتشائم بس ..قالها: ايه الجهل والتخاريف دى!! قالت له: اصل عملتها لابويا يوم الجمعة ومات بعدها على طول!!
قالها وهوا مرعوب: طب ليه كده بس ليه تعمليها يوم الجمعة حرام عليكى يا شيخة احنا ناقصينك!!
للمزيد..
حكاية المهندس والمدرس في بلاد أستونيا ونبؤة الدبابة !! أداء صوتي منى صقر (1-2)
واللى بيغيظنى اكتر لما اتفرج عالتليفزيون والاقى الواحد من دول عمال يدى فى حكم ومواعظ وبعد كام يوم تلاقى صورته منورة فى اخبار الحوادث..!! اومال مين اللى كان بينصح من شوية ده؟؟
والاقى الفنانة الامورة اتحجبت وحفظت كلمتين جاية تقولهم وبعد كام شهر تيجى فاردة شعرها وعاملاه اصفر كمان وتقول ياجماعة دى حرية شخصية! وتلاقيها بعد ماكانت بتعمل دور أم لسبع عيال بقت بتعمل دور فتاة ليل!! اومال مين اللى كانت بتنصحنا من كام يوم دى؟؟ راحت فين؟؟
عشان كده بلاش تسمعوا اى نصيحة من حد لان مفيش حد اصلا كامل و كل الناس بتغلط طول الوقت بس بيستغلوا الفترة القصيرة اللى بيبقوا مثاليين فيها عشان ينصحوا ويعملوا فيها بتوع تنميه بشريه!!
والدليل على كده ان “ديل كارنجى” مؤلف كتاب دع القلق وابدأ حياتك مات منتحر!!
واحلام مستغانمى اللى هاجمت كل الرجالة وعقدت البنات منهم هيا نفسها اتجوزت اربع مرات!! تقريبا عشان تثبت صدق كلامها!!
مرة مذيعة استضافت مطرب مشهور وبتقوله: تنصح زميلك المطرب الفلانى بايه؟
رد عليها بمنتهى البلاغة: لما انصح نفسي الاول !!
رانيا كمال العربي
للمزيد..
عقود الشيطان ..(إغواء وإغراء) هكذا تحول برصيصا من راهب لـ عربيد!!
صفحتنا الرسمية فرندة – Farandh
