عن جبر الخواطر.. الآديبة ريهام مجدي تكتب لـ منصة فرندة

عن جبر الخواطر.. الآديبة ريهام مجدي تكتب لـ منصة فرندة

عن جبر الخواطر.. الآديبة ريهام مجدي تكتب لـ موقع فرندة

من فتره واحدة صحبتي بعتتلي مسدج بتقولي
      – أنا حققت حلمي أخيرًا انا فرحانه أووي …..
أخدت بالي من المسدج بس الوقت مسمحليش أرد….
وأنا بقلب في الفيس بالصدفه لقتها كاتبه إنها إلتحقت بالوظيفه إللي نفسها فيها ولاغيه زر التعليقات ولأنها كانت دايمًا تبعتلي ونادرًا لما برد قلت أبطل سخافه شويه وأدخل أباركلها وأحترم نفسي مش هخسر حاجه دخلت بالفعل ونمت بعدها محطتش في بالي هي هتشوفها ولا لأه ونسيت …
تالت يوم لقيتها باعته voice msg عباره عن عياط…
وقالت بنص
      -من كتر فرحتي بالمسدج حاسه إني بحلم انا أخدتها كذا مره screen shot أنا كنت بفكر أتكلم معاكي فون أشكرك إنك إفتكرتيني وقولتيلي الكلمتين إللي حسسوني إني متشافه وإن حد فرحان لنجاحي أنا بقالي كذا يوم مبنمش مستنيه الكل يباركلي الأشخاص إللي بحبهم للأسف محدش إفتكرني غير كام شخص عشان كده إتكسفت ولغيت الزر…
وقالتلي جمله وجعتني وفكراها لحد النهارده
( أنا ليه محدش بيحبني، ليه دايما منسيه، ليه محدش بيسأل عني رغم اني بسأل علي الكل وبفرح للكل ومبفوتش مناسبه غير لما أبارك)
إتكلمت معايا وحكتلي قد إيه إن إللي حواليها تعبوها نفسيًا بتجاهلهم وطريقتهم معاها، حكتلي كمان إنها لما كانت بتتكلم عن حلمها مكنش حد مصدقها وكانت بتشوف ضحك في عنيهم ساعات كتير ….
صحابها دايمًا ناسيها في مره كانو متفقين ينزلو سوا مع بعض وبعتت مسدج علي الجروب إنتم خارجين النهارده؟
الكل شافها ومحدش رد عليها ….
وبعدها بساعه شافت صورهم سوا وهما برا ..
وإن دي حاجه مأثره فيها وتعباها بتقولي أنا محدش منهم اعتزر مني أو قالي مبرر حتي أو حس إني زعلانه رغم بعدي عنهم…
إختفت فجأه من كل مواقع التواصل بقالي فتره بحاول أوصلها مش عارفه….
النهارده صحيت من النوم علي مسدج من رقم غريب
أنا حدتت ميعاد فرحي واكيد هتكوني معاياا…
اتفجأت انها هي فرحت أوي وباركتلها بكل حب وطلبت منها إني اشوفها…
إتقبلنا وعرفت منها إنها بعدت لإنها بقلها شهور بتتعالج عند دكتور نفسي وراحت لكذا life Coach لحد ما إتحسنت وبعدت عن أي مصدر إزعاج ليها وأي حاجه مش حاسه فيها براحه… قالتلي كمان
أنا دايمًا بفكر نفسي حفاظا علي سلامي الداخلي
-رب الخير لا يأتي إلا بالخير ….
-لو ليا خير في حاجه هخدها …
-اللي بيروح مني وإللي بيبعد عني مش خير ليا لإنه لو خير لبقي…
-الضغوطات والمواقف الصعبة إللي بنتحط فيها ما هي إلا ابتلاء هيقويني اكيد في المستقبل وحتي الابتلاء ده برضوو فيه الخير ليا…
-الدروس الصعبه إلي اتعلمتها في حياتي واتحطيت فيها علمتني أكون قويه اعتمد علي نفسي اكتر…
كل حاجه في حياتنا خير لينا …
بقيت ببص في عنيها وشايفه كميه سلام نفسي وشخص سوي متسامح مع نفسه بعد ما إدمر نفسيًا من إلي حواليه …
سألت نفسي

-هل يمكن أن يشفي الإنسان في البيئه التي كانت سبت معاناته؟
مفيش إنسان فينا مجبر انه يبقي في مكان مش حاسس فيه بالأمان …
-مفيش إنسان فينا مجبر انه يبقي في مكان بيأذيه نفسيًا ويطلب منه انه يبقي انسان سوي ..
-مفيش إنسان مجبر انه يبقي مع أشخاص مش حاسين بوجوده ودايمًا معاه زي ما هو معاهم بيسألو عليه وفكرينه أشخاص بيسحبو طاقته الايجابيه وبيبدلوها بسلبيه…

للمزيد..

بيت القبطية لـ أشرف العشماوي | حَاكموا هدى لأنها أرادت الحياة pdf

     -ابعدو عن اي حاجه تمس سلامكم النفسي لو بنسبه ١% ….
     -كل انسان فينا يستحق انه يعيش بأمان ووسط أشخاص يحبوه ….
نهت كلامنها بإن( ربنا عوضها وهي بخير دلوقتي) …
رغم أني كنت فرحانه اووي بمقابلتها إلا اني حسيت بندم شديد بعدها خصوصًا إني كنت جزء من إلي حسته قد إيه أنا إنسانه مؤذيه بتجاهلي رسائلها أوقات والرد عليها مش هياخد ثانية..
    -مفيش إنسان فينا يستحق إنه يحس بإحساس الرفض من غيره لأنه مؤلم …
    -مفيش حد يستحق إنه يحس إنه قليل في نظر إلي حواليه …
    -مفيش حد من حقه انه يتقل في معاملته مع غيره …
الدنيا مشاغلاها كتير جداا عارفه بس بلاش نيجي علي حد ونفتكر إن كلمه لطيفه منك ممكن تجعل الشخص سعيد والكلمه الطيبه صدقه …
بلاش غرور بلاش غرور في الرد…

       حابه كمان اقول إننا بشر ولازم كل انسان في حياته يفتح باب للإنسانيه… إفتكر إللي حواليك واهلك متقصرش في حق حد اعرف إن رساله مكونه من كام كلمه فتحت باب أمل وحسستها انها متشافه ونقذتها من افكرها وانتشلتها من وحدتها ….
الوحده صعبه والتفكير في انها مش محبوبه اصعب ودايما هتفكر بشكل سلبي …
كل انسان فينا من حقه يتشاف نجاحه كل حاجه حلوه بيعملها مدام انه شخص مش مؤذي ومحب لغيره  💛
(وَأَحْسِنُوا إِنَّ اللَّهَ يُحِبُّ الْمُحْسِنِينَ)

يقلم الآديبة ريهام مجدي

للمزيد..

الروحانية تعني الإستيقاظ .. كيف تساعد نفسك على النهوض؟

صفحتنا الرسمية فرندة – Farandh

الآديبة ريهام مجدي
الآديبة ريهام مجدي
شارك المقالة